SUPERBALITA CEBU

Anti-drugs hingusgan bisan sa hulga sa kinabuhi

DRUG DEN: Labing minos walo ka mga tawo ang nadakpan sa Philippine Drug Enforcement Agency (PDEA) 7 sulod sa usa ka drug den sa Barangay Basak San Nicolas, Dakbayan sa Sugbo niadtong Miyerkules sa gabii, Hulyo 15, 2020. (BENJIE B. TALISIC)

BISAN sa taas nga hulga sa coronavirus disease (Covid-19), magpadayon sa ilang subsob nga anti-drug operations ang Philippine Drug Enforcement Agency (PDEA) 7 tinambayayungan sa kapulisan.

Nipahimangno usab ang PDEA nga di sila magpanuko sa pagpanalipod sa kaugalingon bisan mosangko pa sa kamatayon sa durugista.

Kini ang baud sa bag-ong direktor sa PDEA 7, Levi Ortiz, dihang nahinabi sa Superbalita Cebu pipila ka mga oras human nila napatay atol sa usa ka buy-bust ang usa ka gikatahapang drug pusher sa Barangay Tisa, Dakbayan sa Sugbo.

Matod ni Ortiz nga sa iyang pag-asumer sa bag-ong posisyon, iyang hingusgan pa ang kampanya batok sa illegal drugas bisan sa hulga sa Covid-19.

Mga pulis nga unang natakdan sa Covid-19 mga sakop sa anti-drug units. Ang nakatakod kanila mao ang ilang mga dinakpan sa illegal drugs.

“Ang atong kampanya karon batok sa ginadiling drugas katimbang nato ang mga pulis. With the strong tandem with the PNP, expect a more vigorous and more relentless fight against illegal drugs in region 7,” matod ni Ortiz.

Si Ortiz niingon nga di siya magpanuko sa paglusad og anti-drug operations bisan kon kini mahimong maduguon.

Niadtong Miyerkules sa hapon, Hulyo 15, napatay sa mga anti-drug operative si Franklin Sandoval human kini mamusil kanila atol sa buy-bust sa Sityo Mohon, Barangay Tisa ning dakbayan.

“This is the first time nga dunay casualty sa akong paglingkod isip bag-ong RD sa PDEA.I hope that this will be the last time kay kon mosukol sila, padayon gihapon ang ingon ani (patay) nga panghitabo,” matod ni Ortiz.

BUY-BUST

Sa Barangay Duljo Fatima ning siyudad, pasado alas 12 sa udto sa Miyerkules, Hulyo 15, usa ka suspetsadong drug pusher nadakpan sa dan C.Padilla.

Ang suspek mao si Christian Recafort, 26, nagpuyo sa maong barangay, giilang high value inidividual.

Nasakmit gikan kang Recafort ang 50 gramos nga drugas nga mokantidad og P340,000 base sa Dangerous Drugs Board (DDB) value.

Samtang sa laing high value target ug pito ka mga kauban nadakpan sa PDEA 7 sa Miyerkules sa gabii sa Sityo Alumnos Tabay, Barangay Basak San Nicolas, Siyudad sa Sugbo.

Atol sa buy-bust, nadakpan ang walo ka mga tawo ug pagkadiskobre sa drug den nga gimentinar sa ilang target nga si Ulyses Tradio, 50, mananagat, ug kapuyo niini nga si Roselyn Roda, 39.

Apil sa nadakpan ang ilang anak nga si Jhon, 21.

Laing mga nasikop mao sila si Jay-Ar Trasmonte, 25; Sammy Dela Peña, 37; Jade Desuyo. 49; James Pacres, 22; ug si Lemuel Aldave Alcover, 40, puro taga Basak San Nicolas.

Si IA 1 Jessie Cabutotan sa PDEA 7, nangu sa operasyon, niingon nga tulo ka adlaw nilang gipanid-an si Tradio una gilusad ang buy-bust.

Nasakmit gikan kanila ang 115,000 nga balor sa drugas.

Si Tradio nihimakak nga siya siya namaligya ug nipasabot nga iyang gitugtan ang paggamit sa ilegal nga drugas sud sa sa ilang balay niadto lang adlawa.

Wa na siya motubag sa kadaghan sa mga drug paraphernalia sud sa ilang balay.

Kasong kalapasan sa Republict Act 9165 kun Comprehensive Dangerous Drugs Act of 2002 ang ipasaka batok kanila.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph