SUPERBALITA CEBU

Talisay City, 2 ka lungsod mas moestrikto sa health protocol

MAS estriktong pagpatuman sa quarantine protocol ug ubang lakang alang sa panglawas ang nahiusahan sa mayor sa dakbayan sa Talisay, mga lungsod sa Consolacion ug Minglanilla.

Kini human ang Inter Agency Task Force (IATF) nihukom nga magpabilin nga ubos sa general community quatantine (GCQ) ang naasoy nga local government units (LGUs) atol sa tigom sa Malacañang Hulyo 15 .

Si Presidente Rodrigo Duterte maoy nipahibalo sa publiko bahin sa quarantine status sa matag dapit sa nasod.

Ang maong desisyon nakab-ot tungod sa padayon nga pagsaka sa kaso sa coronavirus disease 2019 (Covid-19) sa nahisgotang mga dapit sa lalawigan sa Sugbo.

TALISAY CITY

Tungod niini, gimando ni Talisay City Mayor Gerald Anthony Gullas ang pagpahugot sa pagpatuman sa quarantine protocol.

“Please be reminded that even though we will be in a GCQ, strict quarantine measures will still be implemented by the PNP together with the AFP,” matod ni Gullas.

Sayo sa buntag, nipahigayon na og foot patrol ang kapulisan sa mga suok nga sitio ug barangay diin naabtan ang 11 ka mga indibidwal nga wala motuman sa health protocol.

Samtang, si PMj. Gerard Ace Pelare, hepe sa Talisay City Police Station (TCPS), nidugang nga padayon gihapon nila nga ipatuman ang one entrance ug one exit policy sa mga sakyanan sa South Road Properties (SRP).

Dugang ni Pelare, sirado giihapon ang utlanan sa dakbayan sa Sugbo ug Talisay sa habig sa N. Bacalso Ave. sa Barangay Bulacao. Matod ni Pelare nga ang ilang mga checkpoint magpadayon bisan asa nga lugar sa siyudad.

Ang mga madakpan nga nakalapas sa safety protocol itanggong sa basketball gym sa Barangay Tapul nga gibanabana adunay gilay-on nga 12 kilometros sa sentro sa siyudad.

Ang pagpangumpra sa merkado sama gihapon sa naandan nga nakaeskdyul samtang kanunay nag-monitor ang kapulisan nga pabiling malinawon ang palibot.

Sa labing uwahing datos nga gipagawas sa TCPS, ang mga nadakpan niabot na og 17 ka tawo ang nakalapas sa curfew, 4 ang wala magsul-ob og mask, 3 ang walay quarantine pass ug 22 kabuok ang nakalapas sa R.A. 4136 o ang kalapasan sa pagmaneho og sakyanan.

CONSOLACION

Sa Consolacion, gipahinumdoman ni Mayor Joannes Alegado ang mga konstituwente niini sa padayon nga pagtubo sa kaso sa Covid-19.

Hinungdan nga kinahanglan nga estriktong subayon ang quarantine ug health protocol sa Department of Health (DOH) aron mominos ang mataptan ug mahimong gawasnon na unya sa kasamtangan nga quarantine status.

Una na usab mihangyo ang mayor sa mga konstituwente niini nga kon man gani walay importante nga lakaw kinahanglan nga magpabilin lang kini sa panimalay aron luwas sa sakit.

MINGLANILLA

Sa Minglanilla, una na nga namahayag ang Mayor Elanito Peña sa pagpadayon sa pag-disinfect sa mga pampublikong lugar sa lungsod.

Kini paagi nga mapugngan ang pagkatap sa virus sa Covid-19. Padayon usab nga ipatuman ang pagdakop o pagpamulta og di mominos sa P500 sa mga konstituwente o indibidwal nga dili magsul-ob ug face mask.

Sa kinatibuk-an nga ihap ang tulo ka mga lugar nakatala na og 1,122 ka mga positibong kaso gikan sa Mayo 24 hangtod sa Hunyo 15.

Sa maong datos, nag-una gihapon sa labing daghan nfa kaso ang Talisay nga nakatala og 590 ka mga positibong kaso.

Gisundan kini sa lungsod sa Minglanilla nga may 274 ka mga positibong kaso.

Sa Consolacion, miabot na usab sa 258 ang nalista niini.

Padayon nga panawagan sa kadagkoan sa tulo ka mga dapit ang disiplina sa katawhan. (ANV, BBT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph