MOABOT sa 130 ka mga bag sa dugo ang nakolekta sa kagamhanan sa dakbayan sa Lapu-Lapu sa ilang blood donation drive sa Hoops Dome, Barangay Gun-ob, Huwebes, Hulyo 16.
Ang maong gidaghanon natigom sa Department of Health DOH-7 ug Philippine Red Cross Lapu-Lapu City Chapter medical team hangtod sa alas 12 sa udto.
Sa alas 3:00 sa hapon, aduna pay daghan nga nidonar sa ilang mga dugo.
Matod ni Mayor Junard Chan nga kadaghanan sa mga midonar mao ang mga coronavirus disease 2019 (Covid-19) survivor sanglit mao kini ang iyang panawagan kanila alang sa maong kalihukan.
Mapasalamaton ang mayor sa pagsanong sa mga Covid-19 survivor.
Ang dugo sa Covid survivor giingong makatabang sa pagmugna og antibodies sa mga pasyente batok sa Covid-19, sumala sa mga batid panglawas.
Si Chan una nang midonar sa iyang dugo niadtong Miyerkules, Hulyo 15, sa DOH 7.
Gawas sa pasyente sa Covid-19, nakapahimulos usab sa natigom nga dugo ang ubang pasyenteng nanginahanglan.
“We are preparing kay rainy season na usab, we’re expecting nga dunay dengue mosulod basta ting-uwan,” matod ni Chan.
Lakip sa midonar sa iyang dugo mao si Konsehal Janvi Dela Serna kinsa bag-o usab nakarekober sa Covid-19.
Siya maoy ikatulong opisyal sa dakbayan nga nataptan ug malampusong nakarekober sa Covid-19 human ni Chan ug Konsehal Rico Amores. (GCM)