KARON nga nagpadayon ang hulga sa coronavirus disease 2019 (Covid-19) crisis, namatikdan ang pagkunhod sa gidaghanon sa nagpa-enroll alang sa school year 2020-2021 diin ang klase magsugod karong Agusto.
Gibutyag ni Department of Education (DepEd) 7 regional director Salustiano Jimenez nga anaa sa 13% ang pagkunhod sa enrollees nga nakita sa ilang sistema karong tuiga kon itande kini sa ilang target enrollees.
Sa labing uwahi nga datus nga nahipos sa DepEd 7 niadtong uwahing adlaw sa enrollment, Hulyo 15, anaa pa lang sa kapin 1.6 milyon ang enrollees lukop sa Central Visayas.
Anaa lang kini sa 87% gikan sa target nga kapin 2 milyon enrollees diin naglangkob kini sa pampubliko ug pribado nga tunghaan sa elementarya ug hayskul.
Matod ni Jimenez nga minus ang enrollees karong tuiga sa private schools diin anaa pa kini sa 24-25% o kapin 79,000 ka enrollees.
Sa private school anaa sa kapin 300,000 ang target lukop rehiyon samtang anaa sa kapin 1.7 milyon sa pampubliko nga tunghaan.
Namatikdan usab ni Jimenez nga ubos ang enrollees sa pribado nga tunghaan sa dakbayan sa Sugbo diin anaa ra kini kapin sa libo.
Matod sa direktor nga kapin 70,000 ang target sa Cebu City alang sa private schools enrollees.
Anaa palang usab sa kapin 132,000 ang enrollees sa public schools sa dakbayan itandi sa kapin 170,000 nga target niini.
Usa sa nakitang rason sa DepEd 7 nga wala pa naabot ang 100% nga target sa enrollees tungod kay adunay mga ginakanan nga usa ka semana bag-o ang klase diha pa-i enroll ang ilang anak, base na usab kini sa mga nahitabo sa nakalabay nga tuig.
Aduna’y usab nga stranded o kining gitawag nga locally stranded individuals (LSIs) nga wala pa makauli sa ilahang lugar hinungdan nga wala pa kini ma-enroll.
Usa sab ning lockdown sa Cebu City nga rason ug kining financial issues karon sa kadaghanan nga minus ang enrollment sa Cebu City hilabi na sa private schools.
Apan bisan paman og niadtong Hulyo 15 ra kutob ang enrollment sa pampubliko nga tunghaan sa elementarya ug hayskul, mamahimo ra gihapon moapas kadtong wala pa-maenroll.
Mao kini karon ang awhag ni Jimenez sa mga ginikanan, kini aron mapangandaman sa ilahang ahensiya ang learning materials nga gamiton karong tuiga hilabi na nga aduna’y nagkadaiyang learning module ang ipatuman subay na usab sa pandemiya nga giatubang karon lukop tibuok kalibutan.
Matod ni Jimenez, ang ilahang learning materials nga iprinta base ra usab kini sa enrollees nila ug basin sila na usab ang basulon nga kuwang ang maong materials hilabi na nga limitado ang ilahang budget niini ingon man mag-agad usab kini kon pila ang na-enroll.
Lakip sa mga pamaagi sa pagtungha sa Agusto 24 mao ang printed modules, worksheets, activity sheets, online distance learning, radio-based instruction ingon man TV-based instruction.
Giklaro usab ni Jimenez nga dili angay mabalaka ang ginikanan tungod kay dili kinahanglan ang gadgets sa pagtungha hilabi na sa pampubliko nga tunghaan samtan gmoobserbar usab kini sa protocol sa panglawas. (HBL)