ARON moabag sa molecular laboratory sa Central Visayas, opisyal nga gibuksan sa Philippine Red Cross (PRC) ang ilang molecular laboratory sa Barangay Jagobiao, Mandaue City, sa Hulyo 16, 2020.
Mokabat ngadto sa 4,000 ka swab samples matag adlaw ang maproseso sa maong molecular laboratory.
Si Senador Richard Gordon, chairman ug chief executive officer (CEO) sa PRC, niingon nga ang 207 metros kwadrados nga laboratoryo gigastuhan og P38 milyon nga gipundohan sa Security Bank, Nature’s Spring ug Geo Transport & Construction.
Ang laboratoryo adunay upat ka PCR machines ug mahimong makuha ang mga resulta sa tests paglabay sa 48 oras.
Matod niya nga ang laboratoryo adunay labing dako nga kapasidad nga maproseso nga swab samples sa Visayas ug Mindanao.
Ang mga molecular laboratory sa Bacolod, Zamboanga, Cagayan de Oro, ug Surigao makaproseso lang og 2,000 ka mga test kit matag adlaw.
Kon motaas pa ang mga kaso sa Covid-19, sigon ni Gordon nga mamahimo silang makahatag og laing duha pa ka PCR machines aron makaproseso na kini og 6,000 ka test kits matag adlaw.
Sa text message ni Dr. Mary Jane Loreche, tigpamaba sa Department of Health Covid-19, siya niingon sa Superbalita Cebu nga Hulyo 15, 2020, ang mga molecular laboratory sa Vicente Sotto Memorial Medical Center nakaproseso lang og 525 testing kits samtang ang DOH naa sa 828 ka testing kits matag adlaw.
Gipaambit ni Loreche nga niining mga adlawa, nalangan sila sa pagpagawas sa mga resulta sa swab tungod sa pagkaguba sa usa sa ilang mga PCR machine.
Gikan sa 48 nga oras unta, nilanat na kini og 72 oras una sila makapagawas sa mga resulta. (KFD)