SUPERBALITA CEBU

Malls gipabuksan ni Labella

Cebu City Mayor Edgardo Labella. (File photo)

GITUGOTAN na sa Cebu City Government nga makaabli ang mga shopping mall, usa ka adlaw human gipaubos sa modified enhanced community quarantine (MECQ) sa Inter-Agency Task Force for the Management of Emerging Infectious Disease (IATF-MEID) ang Dakbayan sa Sugbo.

Si Mayor Edgardo Labella niisyo og Executive Order No. 084 nga maoy magsilbing tamdanan ug giya sa dakbayan samtang gipailawom sa MECQ sa Hulyo 16, 2020.

Kagahapon, Hulyo 16, gipatawag sa mayor ang mga tagdumala sa malls nga gilangkuban sa mga representante sa Metro Ayala, Ayala Center Cebu, Metro Gaisano, Super Metro Colon, SM Seaside, SM City Cebu ug MRSGI-Corporation.

Atol sa tigom, personal nga gianunsyo ni Labella nga tugotan na silang makaabli.

“Gipatawag nato ang mga mall managers. Atong gipahibawo nila nga makaabli na sila except for leisure establishments sama sa movie houses. And there are certain businesses nga 100% and 50 % of their employees were allowed,” padayag ni Labella.

Ang mayor niingon nga ilang nasabutan nga hugot nga ipatuman sa mall management ang social distancing, pagsul-ob og mask ug pagtuman sa hygiene practices sulod sa mga mall ug ubang protocol batok sa coronavirus disease (Covid-19).

“Atong gihangyo ang mga mall operators nga bisan tuod open ang certain businesses, ato gyung ipahan-ay ug ipatunhay ang atong minimum requirement for basic protocol against Covid-19, like social distancing, wearing of mask, good sanitation and hygiene,” dugang sa mayor.

Hulyo 15 sa gabii, gipahibawo ni Presidential Spokesperson Harry Roque atol sa ilang tigom ni Presidente Rodrigo Duterte nga ang Dakbayan sa Sugbo ubos sa MECQ, bugtong dapit sa Pilipinas nga naa ning mao nga quarantine level.

Kini tungod sa padayong pagsaka sa mga kaso sa Covid-19 nga naghimo niining numero sa gidaghanon sa nangataptan sa sakit sa tibuok nasod.

Kadaghan niini mga asymptomatic ug sobra na sa katunga ang naulian.

UYON APAN MAGBANTAY

Samtang uyon ang mga negusyante sa pagpadayon sa operasyon sa mga patigayon bisan sa hulga sa Covid-19 ug kakuwang pa sa bakuna, apan gikinahanglan ang testing ug pagtuman sa estriktong health protocol.

“Since we are on MECQ now, businesses are more concerned on the health of their returning workers. Prevalence testing or PCR testing are more acceptable to them now for the safety of everyone in their workplace. We cannot afford to be on lockdown forever,” matod ni Cebu Chamber of Commerce and Industry president (CCCI) Felix Taguiam.

“We have to learn to co-exist with the virus and we will have to keep on reminding about the basic safety protocol,” matod niya.

Sa pikas bahin, matod ni Taguiam, ang pagbukas og balik sa malls di lang magdepende sa hukom sa managament, apan pagsalig usab sa mall goers nga manggawas.

“It’s the decision of the local government. Although the malls have been preparing for eventual opening soon, but it will depend on the shoppers’ concerns of going back to shop. We, in CCCI, will always remind owners to put safety as top priority to all and let’s all cooperate and heal as one,” siya niingon.

Sa Mandaue City nga ubos gihapon sa general community quarantine (GCQ), si Mandaue Chamber of Commerce and Industry president Steven Yu niingon nga sila naglaum nga ang pagpabilin sa GCQ sa siyudad makaayo sa mga kaso niini.

Si Yu nipasabot nga sagad sa mga negusyo wa mopatigbabaw sa paghuna-huna og ginansya kay mas gipalabi nila nga magpakabuhi hangtod nga naa nay bakuna o tambal nga moabot.

Si Yu niingon nga sagad sa ilang mga sakop nipa-test sa ilang mga kawani ug nagpa-retest bisan kon gasto apan mao ra kining paagiha nga luwas ang mga trabahoan.

“Some businesses who experienced negative cash flow or cash burn, opt to close their businesses. Some will re-open if and when it becomes sustainable again, while others will permanently close,” siya niingon.

GIDID-AN

Ang mga nag-edad og 21 anyos paubos ug 60 anyos pataas, mabdos, mga masakiton gidid-an pagsulod sa mall gawas lang kon adunay balidong rason.

Ang mga supermarket, public ug private wet markets, grocery stores, agri-fishery supply stores, veterinary supply stores, pharmacies ug ubang tindahan gidasig sa mayor nga moabli sa ilang establisemento sulod sa 12 ka oras.

Samtang padayon nga sirado niining panahon sa MECQ ang tourist destinations sama sa water parks, cinema, karaoke bars, kid amusement industries, libraries, archives, museums, internet cafes, gyms, fitness centers ug ubang sports facilities, massage parlors, sauna, facial care ug uban pa.

Ginadili gihapon ang mass gatherings ug ang religious activity gitugotan lang hangtod lima ka mga tawo nga makatambong.

Wa gihapoy gitugotan nga public utility vehicles gawas sa mga bus ug shuttle nga kansang serbisyo gikuha sa mga business establishment.

Wa say biyahe sa inter-island nga mga barko nga magkarga og pasahero gawas sa mga Authorized Persons Outside Residence, apan gitugotan ang mga cargo.

Padayon gihapon nga epektibo ang liquor ban sa pampublikong mga lugar ug ang estrikto nga pagpatuman pagsul-ob sa face mask sa publiko.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph