GIPIRMAHAN ni Presidente Rodrigo Duterte niadtong Hulyo 3, 2020 ang Republic Act (RA) 11479, ang Anti-Terrorism Act of 2020 nga maoy nag-repeal ug naghulip sa RA 9372, ang Human Security Act of 2007.
Matod pa ni Presidential Spokesman Harry Roque, nagpakita kini sa hugot nga tinguha sa administrasyon sa pagpuhag sa terorismo. "The signing of the aforesaid law demonstrates our serious commitment to stamp out terrorism, which has long plagued the country and has caused unimaginable grief and horror to many of our people."
Ang maong balaod nagsilot sa incitement of terrorism "by means of speeches, proclamations, writings, emblems, banners or other representations" ug nagtugot sa pagdetinir sa usa ka suspetsadong terorista hangtod sa 24 ka adlaw bisan way warrant of arrest.
Nagtugot usab kini sa electronic surveillance ug sa bisan unsang matang sa "surveillance, interception and recording of communications" sa mga suspetsadong terorista. Apan way tugoti ang surveillance sa mga journalist, mga abogado ug doktor.
Kabahin sa Section 16 niini nagkanayon, "Provided, That, surveillance, interception and recording of communications between lawyers and clients, doctors and patients, journalists and their sources and confidential business correspondence shall not be allowed."
Apan daghang mga pundok ang mikwestyon sa constitutionality sa pipila ka mga probisyon niini atubangan sa Korte Suprema. Ikawalo nga nikwestyon niini mao ang multisectoral alliance group nga Sanlakas.
Matod pa sa maong pundok, ang Section 4 sa RA 11479 nga nag-define sa "terrorism" kinahanglan nga ideklarar nga nulo kay supak kini sa Article III, Section 4, 1987 Constitution nga nagkanayon: "No law shall be passed abridging the freedom of speech, of expression, or of the press, or the right of the people peaceably to assemble and petition the government for redress of grievances."
Ang Integrated Bar of the Philippines (IBP) National Chapter niingon nga supak usab sa Constitution ang Section 29 niini nga nagkanayon nga way tulubagon ang "any law enforcer and military officer" sa pagdetinir sa usa ka suspetsadong terorista sud sa 14-24 ka adlaw nga wa pasakai og kiha ug paghatag sa Anti-Terrorism Council sa gahom pagluwat og written authorization of arrest.
Matod pa sa IBP, ang Section 18, Article 7, 1987 Constitution nagsitar lang og tulo ka adlaw nga maximum limit sa pagdetinir sa mga suspetsado nga way kiha, samtang ubos sa Section 2, Article 2, 1987 Constitution, mga huwes ra ang makaluwat og warrant of arrest.