DAVAO DE ORO -- Kung duna may nalipay sa planong pagsuspende sa "Hatid Probinsiya," duna say mga tawo nga naguol ug nabalaka sa mga minahal nila sa kinabuhi nga atua sa mga lagyong dapit.
Ang pedicab driver nga si Macario, 37, nalipay sanglit giingon niini nga maminosan ang pagsaka sa ihap sa mga magpositibo sa virus sa Covid-19 gumikan kasagaran niini kadtong gikan sa mga lagyong dapit nga nanguli ning probinsiya.
Apan si Maribeth (bansagon wa gipabutyag) naguol sanglit ang iyang anak tua sa Manila ug nawad-an og trabaho gumikan sa coronavirus disease (Covid-19) pandemic.
Matud sa inahan nga plano sa iyang anak nga mouli sunod bulan, kauban ang asawa apan sa higayong masuspende ang "Hatid Probinsiya," posibleng di dayon makauli ang iyang anak.
Nabalaka sab ang 38 anyos nga si Lailanie nga ang bana atua sa Cebu ug buot mouli ning probinsiya sa katapusang semana ning bulana nga posibleng di sab mahinayon.
Butyag sa babaye nga labihan na ang kamingaw niya sa iyang bana nga halos unom ka bulan na niyang wa magakos ug makatupad sa pagtulog human ma-lockdown didto sa Cebu City.
Hinuon, giklaro ni Alfonso "Jun" Tabas ang Covid-19 spokesperson ning probinsiya atol sa gihimong pakipaghinabi sa SunStar Superbalita pinaagi sa selpon nga ang maong planong pagsuspende sa "Hatid Probinsya" tinguha lang nga maminosan ang mga tawong anaa sa mga Barangay Isolation Unit nga misugwak na tungod sa pagpangabot sa mga locally stranded individuals ug overseas Filipino workers. (Dexter T. Visitacion)