WALA pa mipagula og opisyal nga desisyon ang health department sa Davao City kung wagtangon na ba ang pagpaubos sa hard lockdown sa Barangay 23-C, Isla Verde, Davao City.
Atol sa radio interview kang Davao City Mayor Sara Duterte-Carpio sa 87.5 FM dcDR Byernes, Hulyo 17, giingon niini nga di pa siya makahatag og pamahayag, sanglit naghulat pa siya sa rekomendasyon sa Department of Health (DOH) Davao Region.
"So far, wala pa, but today, makahatag tag updates aning sa Barangay 23-C," ingon sa mayor.
Kahinumdoman ala 1 sa hapon niadtong Hulyo 4, 2020 gipaubos sa hard lockdown ang Barangay 23-C gumikan sa padayong pagtaas sa kaso sa Covid-19 sa maong dapit.
Karong adlawa, Hulyo 18, mao ang ika-katorse ka adlaw sa hard lockdown sa maong barangay diin natahap na sab ang mga residente nga lagmit malugwayan ang hard lockdown gumikan kagahapon nang-apud-apod na sab og rasyon ang lokal nga kagamhanan.
Sumala sa usa ka residente nga nagpaabot og kabalaka sa Superbalita nga ang ilang silingan niadtong Hulyo 16 namatay gumikan gituohang nagka-Covid diin ang tibuok pamilya niini gipangdala na sa Southern Philippines Medical Center. (Jeepy P. Compio)