Duna koy suod nga higala nga bag-o lang na biyuda unya akong gipangutana nganong nagpunay siya og tigom para sa iyang kaugmaon nga wa man unta siyay bana ug anak nga sumosunod sa iyang mga kabtangan ug bahandi.
Ang iyang tubag praktikal kaayo, kining pagpangandam para sa moatiman niya sa iyang katiguwangon kay kini man maoy mopalihok sa tanan gikan sa pag-hire og nurse o care giver nga maoy mo-atiman niya.
Ang akong lindog karong adlawa dedicated sa mga senior citizens, 60 anyos pataas.
Subo og sakit man palandungon ang kamatuoran, apan wa tay kataguan kay kita tanan padong man sa katiguangon.
Tambag sa mga nag-una sa duyan: Ayaw og dalidali og retire kung wa kay klarong hinipusan o kasiguron sa mga benepisyo nga madawat labi na kay kining edara magsugot na ang sakitsakit.
Kung over-aged na gyod unya mandatory na ang retirement kay 65 na, kuhaa ang tanan nimong mga benepisyo sa mga tuig nga ikaw nagserbisyo (SSS o GSIS).
Kung retired na, wa kini magpasabot nga mo-undang na sab og trabaho. Panikay-sikay og pangita og part time job o ginagmay nga kapaninguhaan para padayong lagsik ang panlawas ug mabaid ang utok.
Biyahe, suroy-suroy uban sa imong mga paboritong higala o ba kaha pagkat-on og bag-ong hobby, duwa ug scrabble, crossword puzzle, o paugnat sa kusog. Pwede sab moboluntaryo sa mga kalihukan sa simbahan o kumunidad kay makatabang sab kini palayo sa Alzheimers.
Ayaw pangipon bisag sa imong mga anak aron duna kay privacy ug independence. Kung mangipon gud ka, gawas nga pabigat, wa sab kay choice kundi mosunod sa mga patakaran ug balaod sa imong gisak-an.
Ayaw pataka og gasto sa imong hinipusan o pension. Kung manghatag man gali, ayaw hutda kay sa panahon nga ikaw nay magkinahanglan duna ka pay makuot. Lahi ra gyod ning tubigan ka kay ilugan ka sa mga moatiman.
Ipadayon ang pagpahumot, pagpagwapa og atiman sa kaugalingon aron di sawayon nga nanimahong baul, yuta o patay. Daghan ang mopaduol kung humot ka.