ANG Dakbayan sa Sugbo nakatala og 708 ka mga individual nga naka recover sa coronavirus disease (Covid-19) sa miaging usa ka semana.
Kini ang gipahibawo ni Atty. Rey Gealon, spokesperson ni Mayor Edgardo Labella.
Sa Biyernes, Hulyo 17, ang Siyudad adunay 144 ka recoveries.
Ang Cebu City Quarantine Center (CCQC) nga gidumala ni Yvonne Cania, administrator sa Cebu City Medical Center, ni-release og 52 ka mga Covid-19 positive nga adunay mild-moderate symptoms, apan nangaayo na.
Adunay laing 92 ka recoveries nga pulos asymptomatic sa Barangay Mambaling nga temporaryong niistar sa barangay isolation center.
Si Labella, kinsa maoy namulong atubangan sa 52 ka mga lumolupyo dakbayan, nahinangop nga nakakita sa mga nangaayo.
“First of all, we have to thank the good Lord for His divine healing hands that healed you in this pandemic,” padayag ni Labella.
“She (Cania) asked me to deliver an inspirational message. But to tell you very frankly, I am the one who is so inspired looking at you. I am very very happy,” dugang sa mayor.
Ang gidaghanon sa nakagawas sa Biyernes naghatod ngadto sa 181 ka mga pasyente sa kinatibuk-an nga nakalingkawas sa sakit agi sa CCQC sukad niadtong Hunyo.
Ang matag recovered patient gihatagan og tag 25 kilos nga bugas sa City Government.
Si Cania nagkanayon nga aduna pay nahabilin nga 50 ka pasyente sulod sa CCQC.
Matag Biyernes, sila mo-release sila og mga pasyente nga magnegatibo na sa Covid test.
Ang CCQC adunay average nga upat ngadto sa unom ka mga pasyente matag adlaw diin libre ang ilang kaon ug medical intervention sa mga doktor.
Sa datus sa Hulyo 16, ang Siyudad nitala og 7,782 ka mga kaso sa Covid-19, apan 4, 219 na ang naka-recover niini. Moabot og 3, 158 ang aktibo. (PAC)