Motor rider makagamag barrier

MGA rider sa motorsiklo mahimong makagama sa ilang kaugalingong barrier basta mosunod sa specifics nga giuyonan sa National Task Force (NTF) Against Covid-19 nga gidesinyo sa Provincial Government sa Bohol ug ride-hailing app Angkas.

Si Michael Braga, Department of the Interior and Local Government-Central Visayas (DILG 7) information officer, niingon nga ang DILG di makatudlo og specific nga tighimo sa mao nga barrier.

“The only instruction was that the barrier must meet the standards set by the IATF (Inter-Agency Task Force for the Management of Emerging Infectious Disease),” matod niya sa usa ka chat message sa Biyernes Hulyo 17, 2020.

Ang mga magtiayong mag-angkasay, nagpuyo nga nagpuyo sa samang balay sa mga dapit nga ubos sa general community quarantine (GCQ) ug modified GCQ, maoy unang gitugtan niadtong Hulyo 10.

Pagkakaron, mahimo kini sa mga dapit sa rehiyon 7 gawas sa Dakbayan sa Sugbo nga naa pa sa modified enhanced community quarantine (ECQ).

Sa Hulyo 13, o duha ka mga adlaw sa wa pa ang labing uwahing community quarantine status sa nagkadaiyang mga dapit sa nasod gipahibawo, ang NTF Covid-19 niuyon sa duha ka anti-Covid barrier prototypes alang sa back-riding sa mga motorsiklo.

Kini naglakip sa prototypes nga giduso ni Bohol Gov. Arthur Yap ug ni Angkas chief transport advocate George Royeca.

Ang kang Yap gama sa steel frame nga gisolda sa tunga-tunga sa motorsiklo nga dunay plexiglass kun plastik nga gitaud alang sa physical distancing tali sa drayber ug Angkas.

Ang desinyo ni Royeca kinahanglan ikabiba sa driver nga may gibug-atong usa ka kilo nga sama og backpack.

Ang pagtaud sa barrrier usa sa mga kondisyon sa NTF sa pagtugot og balik sa angkas sa mga motorsiklo.

MEMO

Sa memo nga giisyu ni DILG Secretary Año sa Hulyo 15, kini naglatid sa advisory sa magtiayong mag-angkasay.

Gawas sa barrier, kinahanglan nga duna silay balidong identification (ID) card nga magmatuod nga ang duha managtiayon o nagpuyo sa usa ka balay.

Kinahanglan ila usab nga tumanon ang tanang pamaagi sa kaluwasan diha sa karsada sama sa pagsul-ob sa hustong helmet, pagsul-ob og mask ug uban pang mga personal protective equipment (PPE).

MANAKOP NA

Human sa usa ka semana nga gitugotan ang backriding sa mga motorsiklo alang sa magtiayon, hingpit nga ipatuman sa Mandaue City Police Office ug mga traffic enforcer ang mga back riding guideline sunod semana.

Si Police Colonel Jonathan Abella, hepe sa MCPO, nga sa di pa nila ipatuman ang guidelines, ipahibawo una kini nila sa mga motorista.

Sa pagkakaron, igo lang sila pagpahinumdom sa mga motorista nga makit-an nga aduna nay angkas kabahin sa guidelines, apan dili una sila manakop

Sa laing pakighinabi, sigon ni Arnold Malig-on, hepe sa operasyon sa Traffic Enforcement Agency sa Mandaue (Team), nga basin sa sunod semana na nila mapatuman ang mga guideline.

Kini aron matagaan og igong panahon ang mga motorista nga mopalit o mohimo og barrier sa ilang motor.

Sa laing bahin, adunay usa ka machine shop sa Barangay Canduman, Mandaue City nga namaligya ug nag-install sa mga barrier sa motorsiklo base sa mga disenyo nga gi-aprubahan sa IATF.

Apan, ang MCPO ug Team wala pa magtino sa bisan unsang mga tindahan diin adto mopataod o mopalit ang mga motorista sa ilang barrier. (WBS, KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph