SUPERBALITA CEBU

Migallen: Blackwater di magdugay sa PBA?

Taym pa

BAD news...

Taliwala ning naghingutas nga sitwasyon, gihampak og laing krisis ang Philipppine Basketball Association (PBA).

Kini human nga sa niaging mga adlaw, ang team-owner sa Blackwater Elite nga si Deoceldo Sy wa kapugong sa iyang kaugalingon ug mipabuhagay ngadto sa mga media nga mobiya na siya sa PBA ug andam mobaligya sa iyang franchise og P150 million.

Ang makasurprisang pamahayag ni Sy nagagumikan sa iyang kasagmuyo sa dihang gisilutan og gipamulta ang Blackwater sa PBA og P100,000 tungod sa pagpahigayon niini og ensayo bisan og wala pay pagtugot gikan sa Games and Amusement Board (Board) ug sa Inter-Agency Task Force (IATF).

Tataw nga nadala lang gyud si Sy sa iyang emosyon niadtong higayona ug nakaluwat og pamahayag nga alang sa chairman sa PBA board nga si Ricky Vargas makadaot sa kinatibuk-ang lega.

Tungod niini, mohimo og dugang imbestigasyon si commissioner Willie Marcial ug ang PBA board, ug dili halayo ang posibilidad nga duna pay dugang silot nga ipahamtang ngadto sa Blackwater.

Ang good news...

Kagahapon, giangkon ni Sy ang iyang kasaypanan ug andam kining mangayog pasaylo ngadto sa GAB nga ubos sa liderato ni Baham Mitra.

Sa samang higayon, iyang gipasalig nga gikan sa mga players ug coaches sa ilang team ngadto na sa mga ballboys, dili talikdan sa Blackwater ang ilang obligasyon ug responsabilidad kon unsay nalatid sa ilang tagsatagsa ka mga kontrata.

Iyang gipasalig usab nga ipadayon nila ang ilang committment ngadto sa PBA ug sa mga fans ug sa samang higayon andam silang mokoperar sa liga. At least, gipaubos ni Sy ang iyang baruganan ug garbo.

Pero wa kini magpasabot nga dili na mobiya ang Blackwater sa PBA. Posibli nga ila lang una limpiyohon ang tanan nilang obligasyon samtang wala pay interesadong mopalit sa ilang prankisa. Unless og mausab ang hunahuna ni Sy.

Tinuod nga daghang mga kompaniya nga gustong mosulod sa PBA apan sa pagkakaron nga grabing pagkagusbat sa ekonomiya di lang sa Pilipinas kon dili sa tibuok gyud kalibutan tungod niining hudlat sa coronavirus disease (Covid-19) mediyo lisod pa nga mohagad og palit sa maong franchise.

Di usab madali-dali ni Sy pagbaligya ang ilang prankisa kay kinahanglan pa man kining moagi ug aprobahan sa board.

Ipaubos pa usab og screening ang mopalit niini aron tinuon ang kapabilidad sa kompaniya kon makasugakod ba sa gastuhan. Labaw sa tanan, sukdon usab kon unsa ka dako ang committment niini ngadto sa lega.

Hinuon kining nahitabo sa Blackwater dili bag-o sa PBA. Nahinumdom mo sa Tanduay Rhum Masters? Ang maong team perming nalambigit og kontrobersiya tungod ra usab sa giingong mga violations niini.

Tungod sa kasagmuyo, ang team nga gipanag-iya ni Lucia Tan gi-disband niadtong 2001 ug gibaligya ang franchise ngadto sa FedEx Express.

Bisan sa nahitabo, ang PBA nagpabilin lang gihapon hangtod karon ug wa matarog sa pagkawagtang sa usa ka team.

Mao nga wa kaayo mabalaka ang PBA kon mawagtang ang Blackwater kay aduna na silay igong kasinatian sa ingon ani nga sitwasyon.

* * *

By the way, ako diayng pahasubo sa pamilyang Shane Barrita kinsa mipanaw na sa laing kalibutan sa niaging adlaw tungod sa Covid-19.

Si Barrita kanhi player sa Salazar Institute of Technology (SIT) Skyblazers niadtong tungatungang bahin sa 1990s.

Pipila sa iyang gikauban sa SIT sila si Ricky Garciso, Benjie Adlawan, Winston Sanchez, Ronald Paraiso, Glenn Yuson ug Loyloy Estrera.

Pila ka tuig ang milabay mitapon siya sa SWU Cobras. Rest in Peace, Shane. (jun.migallen22@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph