MASUSO pa lang si Isaiah Immanuel “Dodoy” Abaquita, nakaagi na kini og kasakit ug pag-antos.
Hangtod karon dala niya ang pag-antos, apan wala mawagtangi og hugot nga pagsalig ang iyang mga ginikanan sa Labaw nga Makagagahum alang sa kaayohan sa iyang sakit.
Si Dodoy, 6, naghambin sa sakit nga hemolytic anemia diin ubos ang red blood cells sa iyang dugo.
Si Mary Ann Abaquita, inahan ni Dodoy, nihulagway sa iyang anak nga isog ug usa ka fighter.
Kini ang hinungdan nga sa matag achievement nga mabuhat o makab-ot ni Dodoy, dako nga kalipay ug garbo na kini alang kang Mary Ann, sa iyang bana nga si Ariel ug sa ilang pamilya.
Karong bag-o, nanghakot og ubay-ubay nga awards si Dodoy sa pagtapos sa Kinder 2 sa Abundant Grace Learning Center sa siyudad sa Sugbo.
Apil niini ang with honors, Brave Soul Award, Determined Kid Award, Kinder Buddy Award ug Loyalty Award.
Tungod sa krisis sa Covid-19 pandemic, wa mahitabo ang gipangandaman nga seremonyas sa graduation.
Giasoy ni Mary Ann nga dili lalim ang pag-antos sa ilang anak. Unom ka buwan pa lang kini dihang nagsugod ang pag-abuno sa dugo.
Una siya na-diagnose nga dunay leukemia apan human sa pipila ka tests ug mga pagtambal sa bata, nigawas nga hemolytic anemia ang iyang sakit.
Dihay mga panahon nga sa matag ikatulo ka adlaw siya abunohan og dugo ug matag duha ka semana siya ipaubos sa complete blood count aron ma-monitor ang iyang dugo.
Dihay higayon nga ka-13 siya natusokan og dagom dihang dugay nakit-an ang iyang ugat.
Niadtong 2017, nabali ang bukog sa iyang tu’o nga tiil human ma-slide sa ilang panimalay.
Pagka 2019, nadisgrasya si Dodoy sa iyang pag-ambak ug naapektuhan na usab ang iyang tu’o nga tiil hinungdan nga nagsakay kini og wheelchair sa iyang pagtungha.
Dili pa lang dugay nakagawas si Dodoy sa tambalanan kay niubos ang hemoglobin sa iyang dugo.
“Brave gyud si Dodoy, sa tanan nga naagian niya grabe ang iyang naagian, dili lalim. Makita gyud nimo nga ni-survive siya. Fighter gyud siya,” pamulong ni Mary Ann.
Matag buwan, abunohan og dugo si Dodoy sa Perpetual Succour Hospital. Apan bisan sa kalisod ug sa iyang pagkabata pa, namatud-an ni Dodoy nga kaya niya manlimbasog ug mopahiyom sa pagsuway sa kinabuhi ug makab-ot ang kalamposan.
“Pirme namo siya sultian nga proud kaayo si Mama ug Papa nimo! Very good! Maka-appreciate man siya nga proud mi niya. Bisan unsa kagamay ang iyang nabuhat, proud gyud mi sa iyaha,” dugang sa 42 anyos nga inahan. (SCG)