WA MOSALIR ang kaabtik ni “Colonel kay nadakpan sa buy-bust niadtong Biyernes sa alas 5:20 sa hapon, Hulyo 17, 2020 sa Barangay Calongcalong, Dakbayan sa Toledo.
Ang suspek nga giilang bigtime drug pusher di usa ka opisyal sa pulis o militar. Siya giilang si Colonel De Dios, 36, ulitawo, nagpuyo sa nahisgutang lugar, gitumbok nga high value individual (HVI) sa kapulisan.
Si Police Staff Sgt. Jonathan Cuizon, sa Toledo Police Station nga nahinabi sa Superbalita Cebu, nagkanayon nga si Colonel ilang nadakpan human sa pipila ka simanang monitoring.
Naglisod sila sa pagdakop gumikan sa kaidlas kay daghan siyag mga mata sa dapit.
Apan naabtan siya sa dimalas kay nakatayming ang ilang tropa kay napalitan og usa ka pakite nga shabu nga mobalor og P300 mao nga ilang nadakpan.
Nakuhaan pa siyag laing tulo ka dagkong bulto nga putos, siyam ka gagmay nga putos, drug paraphernalia ug P670 nga gituohang halin.
Ang drugas motimbang og 25.30 gramos nga mobalor og P172,040 base sa Dangerous Drugs Board value.
Matod pa ni Cuizon nga gisubay na sa ilang mga intelligence officer ang mga kontak ni Colonel. (GPL)