ISIP usa ka pamaagi aron matabangan ang mga nawad-an og trabaho sa Liloan, Cebu, gilusad ni Mayor Christina Frasco ang "Liloan Works program".
Ang programa usa ka pagtabang sa mga trabahante ug pagpabangon sa ekonomiya sa lungsod sa Liloan nga naapektuhan sa coronavirus disease (Covid-19).
Sa Facebook page ni Frasco, ang Liloan Works adunay duha ka mga programa, cash for work ug food for work.
Pinaagi sa paggamit sa panudlanan sa lungsod, si Frasco naghimo og usa ka paagi aron matabangan ang iyang mga konstituwente samtang naghulat alang sa tabang sa nasudnon nga gobyerno.
"Our local government will help and at the same time, we give people the opportunity to help themselves, and to reclaim unto their lives the dignity of work," ingon ni Frasco.
Ang benepisyaryo sa programa hatagan og trabaho susama sa urban farming, pagpanglimpyo sa kadalanan, mga sapa o baybayon, pagtanom og mangroves, prutas ug kakahoyan, ug uban pang mga buluhaton sa kalikopan.
Mosunod gihapon sila sa minimum health standard sama sa pagsul-ob og mask ug social distancing.
Ang mamahimong maka-apply sa programa kinahanglan nga unom na ka buwan nagpuyo sa Liloan sa wala pa ang July 2020. Ang mga mo-apply sa cash for work kinahanglan nga rehistrado nga botante sa munisipyo.
Kini nga mga residente sa pagkakaron way trabaho tungod sa pag-undang sa negusyo ug pagsira sa negusyo tungod sa pandemya o tungod sa enhanced community quarantine (ECQ).
Kadtong mga self-employed nga naapektuhan ang panginabuhian tungod sa pandemya, mahimong maka-apply.
Ang mga miyembro sa transport group sama sa habalhabal, tricylce, ug public utility van (PUV) nga way panginabuhi tungod sa pagdili sa pagbiyahe sa pampublikong transportasyon, mamahimo sang maka-apply.
Ang mga aplikante kinahanglan nga nag-edad og 21-anyos hangtod 60-anyos.
Ang aplikante o ang mga panimalay niini dili kinahanglan kwalipikado alang sa bisan unsang pinansiyal nga tabang gikan sa national government.
Ang mga aplikante kinahanglan dili immunocompromised ug kinahanglan way mga sintomas o wala magpositibo sa Covid-19.
Giklaro ni Frasco nga usa ra ka aplikante ang gitugotan sa matag panimalay.
Aron maka-apply niining programa, kinahanglan i-download ang application form nga gi-post sa opisyal nga pahina sa Facebook ni Frasco ug i-email kauban sa proof of residency, cerificate of eligbility sa Municipal Social Welfare and Development (MSWD) ug bisan unsang giisyu sa gobyerno nga identification (ID) card. (KFD)