DUL-AN sa 2,000 ka mga small transport driver ang mahatagan og ayuda sa lungsod sa Consolacion.
Sagad kanila mga habal-habal driver, tricycle drivers ug jeepney drivers nga makadawat og tag P2,000 isip abag sa lokal nga kagamhanan.
Matod ni Consolacion Mayor Joannes "Joyjoy" Alegado nga usa sa labing apektado ang transport groups tungod niining giatubang nga pandemya.
Ilabi na nga sobra na sa tulo ka buwan nga gipaubos sa community quarantine ang lungsod.
Wala usa'y gitugotan nga makabiyahe nga mga pasaheroan tungod sa lagda sa Inter Agency Task Force (IATF) nga pag stay at home.
"Kita naghinan-aw pod sa ilang kalisod nga nahiaguman mao na nga ato sad gipangitaan oug pamaagi nga makahatag kita ug ayuda ngadto sa mga habal-habal drivers", matod ni Alegado.
Hinuon gipasabot ni Alegado nga di tanan ang makadawat, tungod kay gipasusi niya kini sa mga barangay kapitan ug ubang barangay officials aron pagsiguro sa tinuod nga panginabuhian niini.
"Gi verify ni sa mga barangay captain ug barangay officials kay sila may nahibawo sa panginabuhian ani nila. Naay pipila nga wala makaapil kay dili rehistrado o walay lisensya", matod ni Alegado.
Lakip usab sa dili makadawat kadtong nalakip sa pagdawat sa Social Amelioration Program (SAP) ug uban pang benepisyaryo nga gikan sa kagamhanan.
"...Ato nalang pod ihatag sa katong wala makadawat og ayuda," matod ni Alegado. (ANV)