PIPILA ka mga adlaw ang nakalabay, ang pangu sa Cebu City Transportation Office, Alma Barandog, nipahibawo sa publiko nga nangandam na sila alang sa pagbutang og bike lanes sa Natalio Bacalso Avenue ug Osmeña Boulevard.
Duna silay ipamutang nga signages sa mao nga mga dan aron masayod ang publiko ug mahimong luwas ang mga siklista, labina kadtong mag bike-to-work. Lisod na ra ba kaayo rong panahuna ang pagsakay kay way public transportation busa lisod ang paglihok.
Di usab sayon ang pagpalit karon og motorsiklo. Busa, ang biseklita maoy labing madali sa pagpalit sa yano nga mga lungsoranon karong panahuna. Aron luwas ang mga siklista, mas maayo nga dunay klarong bike lane nga ilang subayon. Kinahanglan usab nga higpit ang pagpatuman sa balaud aron kadtong mangabusong mga driver sa mga sakyanan motahod sa lane.
Segurado ko nga dunay mangabuso, sama sa nahitabo sa Mandaue City nga dunay portions nga naghimo sa bike lane nga parking area. Duna say mga motorsiklo, kansang drivers naghimo ining motorcycle lane.
Busa, sila gipamulta sa traffic office kay kalapasan sa lagda ang ilang gihimo.
PILIPINAS
Ang pagdagsang sa mga biseklita sa karsada wa lang mahitabo sa Sugbo. Mao usab kini ang nahitabo sa Metro Manila. Busa, nagbutang usab ang kagamhanan og lanes sa mga biseklita aron maoy subayon sa mga siklista. Gipanakop sa traffic authorities ang mga driver nga nag-park sa bike lanes.
Bisan pag mabalik na ang public transport sa umaabot nga mga buwan, samtang naa pang hulga sa coronavirus ug wa pay bakuna, daghan pang mga tawo nga mahadlok mosakay. Kadtong way motorsiklo ug di maka afford pagpalit, mopili ug mogamit sa biseklita isip ilang transportasyon.
Kadtong medical personnel nga naa lang sa Cebu City nagpuyo, mas mopili sa biseklita nga transportasyon kay sa public transport.
TIMAILHAN
Sa ako nang giingon, ang pagdaghan sa mga biseklita ug motorsiklo sa karsada timailhan sa dakong problema nga mao ang trapiko, kakuwang sa masaligan nga public transport. Labaw na karon naghulga ang Covid sa nasod.
Bisan gani sa Europe, ang mga tawo nagpili sa biseklita kay ilang na feel nga mas luwas sila kay sa motipon pagsakay sa public transportation. Mas dako ang ilang kahigayunan nga mataptan sa kagaw.
Busa, panahon ning pandemic, ang biseklitang giyam-iran kaniadto, mao na ang gipangita karon sa publiko.