ALESSANDRA de Rossi ug Paolo Contis sobrang malipayon karon ug mapasalamaton kay trending ang duha sa social media.
Nahibulong na lang ko ug nakapangutana kon unsa man gyud ni nga pelikula ang "Through Night and Day."
Nganong kini man ang pirmeng hisgutan nila labi na sa facebook, daghang komento ang akong nabasahan ug usa ray padulngan nga drama love story kini kay makahilak man gyud ang kasagaran nakong masugatan nga ipamulong sa nakakita na niini.
Gani sa pirmero abi nako og korean movie kini hangtod nga nahisgutan nila ang duha ka bida dinhi nga silang Alessandra de Rossi ug Paolo Contis.
Duha ka tuig na nga milabay sa dihang gisalida kini sa mga sinehan apan hilom ug wa kaayo mokita ang maong pelikula.
Karon panahon sa quarantine gisalida kini og balik sa Netflix kon wa ko masayop ug tungod niini, kalit nga nautingkay ang katawhan ug nahigugma sa pelikula.
Matod pa gani ni Alessandra sa iyang tweet nga pagbuot kini sa kahitas-an nga masalida ang movie nila atol sa quarantine diin ang tanan nagkinahanglan og pure love ug pagsabot.
Karon nag-una ang pelikula sa Philippine's top list sa Netflix ug daghan sab kini'g nadawat nga mga pagdayeg dili lang sa istorya, labaw pa sa mga bida niini.
Hinuon kon aktingan lang ang hisgutan, dili sab kabentahaan ang duha tungod kay daghan na sab sila og napamatud-an, mapa-comedy man o drama.
Kinsa may dili malipay kay hasta na gani mga netizen nipadayag sa ilang kadismaya kon nganong wala kini nila suportahi sa dihang gisalida kini sa mga sinehan.
Apan unsa man gyud kining "Through Night and Day?". Estorya kini sa manag-hinigugmaay nga na-engage human sa pipila ka tuig nga panagtipon.
Sa dihang nag-tour sila sa Iceland, daghang mga panghitabo ang ilang nasinati nga maoy nahimong hinungdan sa ilang panagbuwag.
Kon unsa pay sunod nga mahitabo tan-awa lang ninyo para ma-appreciate gyud ninyo og maayo ang pelikula ug daghan na ang motulo ang luha.
Kinsa man ang magtuo nga mahimong numero uno kini karon ug init nga gihugopan og tan-aw sa tanan. Gani matod pa ni Alessandra sa dihang nag-inusara siya gpromote niini niadto sa mga sinehan, pwerting mingawa ug walay hapit tawo sa sulod.
Mao nga karon pareho silang Alessandra ug Paolo nga nagpasalamat sa tanang nisuporta sa pelikulang "Through Night and Day," tan-aw nah, Ay'g Saba!
* * *
Malipayon si Dimples Romana, nahibulong usab si Sam Milby, sobrang malipayon ang Dimples sa dihang nakadawat kini ug imbitasyon nga mahimong hurado sa Emmy's didto sa New York City.
Mura daw og damgo nga nahimong tinuod ang maong panghitabo mao nga karon pa lang iya na kining gipangandaman.
Sa laing bahin dakong kahibulong ni Sam Milby sa post sa ex boyfriend ni Catriona Gray kaniya nga makig-chat.
Unsa kahay ilang hisgutan siguradong dili sab siguro si Catriona? Ato nang mahibawan sa umaabot kon madayon ang ilang panagtabi, Ay'g Saba!