Binasi sa Kaalaman 12:13, 16-19; Salmo 86; Taga-Roma 8:26-27; Mateo 13:24-30
KALIBOG kining atong kasamtangang kalibotan, ilabina kanang ginatawag nga “political correctness”. Kini ang pagbantay sa mabuhian nga pulong nga kinahanglan walay masilo nga tawo o pundok sa mga tawo. Sa usa ka bahin, mahinungdanon kini kay adunay mga pagpihig kun “prejudice” batok sa ubang mga tawo nga binasi sa kaliwat, kadugo, bulok sa panit, relihiyon, sinultian, pagtuo, ug uban pa, kansang pagpihig nakaminus kanila. Molutaw kining mga pagpihig sa mga pulong nga gilitok ug gisulat.
Sa laing bahin, mahimo sad kining mapalabihan nga dili na lang kita mahimong manugsog, mokatawa, mopakatawa, motiawtiaw, ug uban pa nga natural nga bulohaton sa tawo. Matag higayon nga aduna kitay kaistorya o kahimamat, morag maghulat na lang kita nga adunay moligas o motipas. Unya dasmag dayon? Mopagawas dayon og hinagiban nga legal. Morag dili pod kini makatarunganon.
Naa poy higayon diin ang usa ka pundok sa mga tawo mopahayag sa ilang pagtuo o gibati. Magpaandayon sila sa katilingban apan kon adunay mopahayag og sukwahi nga panghunahuna, mopagawas dayon sila og hinagiban nga kulturanhon. “Hate speech” kuno. Makita kini sa gitawag og “identity politics”. Ang nakapamali kun “irony” niini kay sa ilang pagduso nga tugotan o pasagdan sila nga magpuyo subay sa ilang pagtuo, dili nila tugotan o pasagdan ang uban nga mopahayag pod sa ilang pagtuo. Makita kini nato, pananglit, sa pagduso sa gitawag nga “gay marriage”. Kon mopahayag ang usa ka tawo o pundok nga sukwahi kini sa ilang pagtuo, tawgon dayon sila og “hate mongers” ug wala nay pagkulokabildo. Labayan na lang dayon og mga hinagiban nga pulong.
Ang “toleration” kun pagtugot o kapasagdanan usa ka reyalidad sa atong komplikadong kalibotan diin managlahi ang mga panghunahuna. Dili kini sayon sabton o buhaton. Diha sa ebanghelyo, miingon ang amo sa umahan nga nasagolan ang trigo sa sagbot: “Pasagdi nga magdungan og tubo ang duha hangtod sa ting-ani; ug inig ka ting-ani...” Dili lang ibton kondili tugotan. Dili sad ni paandayon kay sa kataposang paghukom ilahi man ang duha.
Giila ni Jesus nga sa kalibotan managsagol ang maayo ug daotan, ang mga sakop ug dili sakop sa gingharian sa Dios. Kon mangita kita og pundok nga kining duha dili managsagol, mas maayo pang moadto kita sa labing lalom nga parte sa dagat o sa labing layo nga bituon sa kalangitan. Kay sa tinuoray, bisag sa atong kahiladman, nagsagol ang duha ka reyalidad.
Apan sama sa mga sambingay mahitungod sa pagtubo, gipahinumduman kita nga pahugtan pa gayod nato ang atong pagsalig sa probidensya sa Dios taliwala sa tanang mga pagsulay ug mga babag. Hinumdoman pod nato ang sambingay mahitungod sa tanom nga igera nga wala mamunga. Ipaputol na unta apan gilugwayan pa og panahon diin kini abunohan ug bugkalon ang yuta. Ang panagsagol diay tawag sa pagkakabig ug kabag-ohan.