MAHULOG ni nga komedya. Manawagan lang ta sa mga tawo nga masakiton labi pa sa mga pasyente sa Covid 19 nga dili lang magpa-hospital gumikan kay adunay shortage karon sa atong mga hospital room. Tanang hospital, ma-private o public man. Puno na gyud ang mga hospital labi pa ang gitagana nga mga room sa Covid patients.
Kon puno ang mga hospital, puno na usab ang mga sementeryo nga kalubngan sa mga nangamatay. Dili usab dayon ma-cremate ang mga namatay kay nakalinya ang i-cremate unya puwerting mahala pa. Mokabat ngadto sa P100,000 ang cremation. Dili maka-afford ang mga pobre ani.
Magtukod unta og sementeryo ang Kagamhanan sa Dakbayan sa Sugbo sa bukirang barangay sa Guba aron kalubngan sa mga nangamatay. Apan nabaraw ug gipahunong gumikan kay wala mo-apply og mga permit ang Kagamhanan sa Dakbayan ngadto sa Department of Environment and Natural Resources (DENR) sama sa tree cutting ug environmental compliance certificate (ECC). Wala usay public hearing nga napahigayon tali sa apektadong mga lumolupyo.
Ania kita sa emergency situation. Ug ang paghipos sa atong mga minatay maoy usa ka paagi sa atong pagtubag sa pandemiya. Kon atong sundon ang proseso sa paglukat og mga permit, dugay pa kini kay daghan pa kaayo og kuti-kuti. Mao ni ang giingon sa Iningles nga ‘bureaucracy’. Bureaucratic red tape.
Gumikan lagi kay ania man kita sa emergency situation, dili ba kaha usa mahiklin nato makadiyot kining maong kuti nga paagi ug atong tugutan nga mapahigayon sa labing madaling panahon ang pagtukod og sementeryo? Total gobiyerno ra man pod ang nag-apply niini. Kon atong gihiklin ang mga lagda sa Commission on Audit (COA) kabahin sa bidding sa panahon sa emergency nga kuwarta maoy atong giprotektahan ana, nganong dili man usab nato makonsiderar ang pag-hiklin aning bureaucratic red tape sa gobiyerno tungod sa dinaliang panginahangalan? Hinuon, ibalhin na man sa Barangay Sapangdaku ang pagatukuron nga sementeryo. Wala na pod kahay isyo nga motumaw ani?
(bobbygnalzaro@gmail.com)