GIKAN sa 17 nga nagpositibo sa pagsugod sa Hulyo, nisaka na ang gidaghanon sa mga pulis sa Mandaue City nga nasakit sa coronavirus disease (Covid-19) ngadto sa 28 human sa duha ka semana.
Niadtong Hulyo 1, 2020, nataho sa Mandaue City Police Office nga dunay 17 ka mga pulis nga ilang ginsakpan nga nataptan sa Covid-19
Gikompirmar ni Police Colonel Jonathan Abella, hepe sa MCPO, nga nadugangan og 11 ka mga pulis ang gi-Covid.
Sa 28 ka mga pulis, tulo ang naayo na samtang 25 pa ang padayon nga nakigbugno batok sa virus. Dugang pa niya, wala pay nataho nga namatay tungod sa maong sakit.
Sigon ni Abella nga sa 25, dunay duha ka mga pulis nga gi-admit sa ospital samtang ang uban gipailawom sa home isolation ug anaa say naa sa quarantine facility.
Ang pasilidad sa quarantine alang sa mga pulis naa sa Mandaue City Isolation Center nga nahimutang sa Barangay Centro, Mandaue City. Ang mga close contact sa mga nagpositibo gipaubos na sa swab testing.
Karon, sigon ni Abella, nga naghulat pa sila sa mga resulta.
Bisan og nakuhaan ang pwersa sa kapulisan sa Mandaue, si Abella niingon nga nagpadayon pa sila sa pagpahigayon sa ilang rekorida sa palibot sa dakbayan aron ipahinumdom sa publiko ang pagsul-ob og face mask, pagsunod sa social distancing ug mogawas lang kon adunay panginahanglan kaayong tuyo.
Sa laing bahin, sigon ni Abella nga limitado pa gihapon ang pagpasulod og mga opisyal sa kapulisan ug mga bisita sa headquarters sa MCPO.
Balik na sab sa operasyon ang Opao Police Station human gi-lockdown sa miaging buwan tungod sa nagpositibo sa Covid-19 nga mga piniriso ug pulis.
Siya nidugang nga ang MCPO nagpadayon pa sa pagsunod sa ilang mga protocol. Gani gisiguro usab sa MCPO nga ang mga piniriso nga naa sa ilawom sa ilang kustodiya ipaubos sa reverse transcription polymerase chain reaction (RT-PCR) test. (KFD)