NAGTANYAG si Cebu City South District Representative og sistema alang sa quarantine passes ug siya usab mismo ang magpasiugda sa paghimo sa 240,000 color-coded cards.
Kon uyon ang Cebu City Government ug Regional Inter-Agency Task Force sa iyang proposal, humanon ni Abellanosa ang mga color-coded cards nga adunay serial number sud sa usa ka semana.
Gamiton ni Abellanosa ang iyang kaugalingong panudlanan aron ilisan ang “useless QR codes” nga nakabutang sa quarantine passes nga gigamit sa publiko karon.
Matod niya nga sa karon nga set up, bisan kon 178,000 quarantine passes ra ang giapod-apod sa Siyudad ngadto sa mga residente, ang scheduling ani magtugot sa pagpagawas sa 90,000 ka mga residente sa usa ka adlaw.
Ang Cebu City Hall nag-apod-apod og 178,000 ka QR-coded passes niadtong Hunyo human gikanselar sa Department of the Interior and Local Government (DILG) ang 250,000 ja quarantine passes nga giisyu niadtong Marso.
Base sa Executive Order No. 82-A, ang adunay mga quarantine passes nga ang uwahi nga numero odd numbers (1, 3, 5, 7, 9) kay makagawas sa Lunes, Miyerkules, ug Biyernes. Ang nag-uwahi og even numbers (0, 2, 4, 6,) kay makagawas sa Martes, Huwebes, ug Sabado.
Samtang sa proposal ni Abellanosa, ang mga residente i-grupo sa tulo kon diin aduna na lay 80,000 ka mga residente ang magdungan og gawas sa usa ka adlaw.
Ang mga residente kay ma-grupo ug makagawas lang sa Lunes ug Huwebes; Martes ug Biyernes; ug Miyerkules ug Sabado.
“The basic arithmetic of quarantine passes: the lesser the weekdays people are allowed to go out for essentials, the more QPs for households and lesser people going out,” matod ni Abellanosa.
Kon mosugot ang City Hall ug RIATF, ang buhaton na lang sa City Hall mao ang pag-attach sa seal ug ang pag-distribute niini samtang ang paghimo ug paggama kay pagabuhaton ni Abellanosa ug sa iyang staff sa Cebu City South District Operations Center. (JJL)