ANG Cebu City Council nitugot kang Cebu City Mayor Edgardo Labella sa pag-apply alang sa reclassification sa timberland nga luna sa bukiran sa Barangay Sapangdaku aron gamiton sa Cebu City Memorial Garden alang sa mangamatay sa Covid-19.
Ang dapit sa Sitio Patayng Yuta ug Sitio Baksan sa Sapangdaku gi-classify isip timberland.
Gikinahahanglan nga i-reclassify kini nga maoy nalatid ubos sa The Public Land Act nga nagtugot sa pagbalhin sa sa classification pinaagi sa environment secretary “for the purposes of their government and disposition.”
Ang Department of Environment and Natural Resources makaisyu sab og Special Land Use Permit alang sa publikong paggamit sama sa timberland, matod sa resolution nga gipangmahanan ni Cebu City Councilor Phillip Zafra.
Busa, ang Konseho nihangyo sa Department of Environment and sa Natural Resources (DENR) dinaliang pag-uyon, kon ang Kagamhanan sa Siyudad makakompleto sa tanang rekisitos, sa iyang aplikasyon alang sa Special Land Use and the Forest Land Use Agreement.
Ila usab nga gihangyo ang DENR sa pag-waive sa abangan ug bonds sa duha ka hektaryang luna.
Sa laing resolusyon, ang Council wa mobabag sa pagbutang og sementeryo basta motuman sa tanang mga regulasyong lokal ug nasyunal.
Si Eddie Llamedo, pangu sa Planning and Management Division sa DENR, niingon nga ang ilang director nipadalag suwat sa Konseho nga dunay listahan sa mga resolusyon nga kinahanglang uyonan sa Konseho.
Ang mga resolusyon nga kinahanglang ipasasar mao ang (1) resolution nga nag-amendar sa karon nga Comprehensive Land Use Plan (CLUP) nunot sa kausaban sa pagtukod sa sementeryo; (2) resolution nga nag-endosar o wa magbabag sa pagtukod sa proyekto; (3) resolution nga nagtugot kang Labella sa pag-apply ug pagpirma alang sa Siyudad sa nagkadaiyang permitting requirements; (4) mopasar og ordinansa alang sa Cebu City Memorial Garden for Covid-19 victims; ug (5) Barangay resolution nga wa magsupak sa proyekto.
Si Llamedo niingon nga si Environment Secretary Roy Cimatu nimando sa DENR 7 officials sa paghatag sa gikinahanglang suporta sa Siyudad lakip na sa “minimal payment for any tenure instruments or memorandum of agreement (MOA) that will be issued.”
Gimandoan usab sila ni Cimatu nga kon mahimo gamay lang nga kahoy ang pamutlon sa pagtukod sa sementeryo, matod ni Llamedo.
“We welcome the actions of the Cebu City Council in approving very important resolutions to expedite the approval of some regulatory requirements from various government authorities to eventually establish or operate the Cebu City Memorial Garden for Covid-19 victims,” dugang ni Llamedo.
Gipaneguro ni Llamedo nga ang DENR modawat ug moabag sa Kagamhanan sa Siyudad sa paghikay sa tanang mga gikinahanglan niini alang sa proyekto.
Ang pagtukod sa sementeryo, matod sa giaprobahang resolusyon, maoy tubag sa daghang nangamatay sa coronavirus disease ug sa panginahanglan sa dinaliang paglubong sa mga lawas.
Nakita sa Konseho nga tungod sa kadaghan sa namatay, napuno na ang mga sementeryo.
“This unparalleled crissi, with no end in sight in a foreseeable future, known in modern history, will bring the Cebu City’s overall government health care infrastructure to the brink of disarray if no immediate intervention related to the disposal of human remains will be in placed,” matod sa resolution.
Gitataw sa Konseho nga ang sementeryo libre alang sa mga lumolupyo sa Siyudad sa Sugbo. (JJL)