DUHA ka mga tawo ang nangamatay, usa niini menor de edad, human natabunan sa yutang nahugno sa sitio Ilaya, Barangay Guinacot, Siyudad sa Danao alas 9 sa Biyernes sa gabii, Hulyo 17, 2020.
Mga unom ka oras una pa sila nag-ukat sa rescuers nga nigamit na og heavy equipment.
Ang mga biktima alas 3:15 na sa Sabado sa kaadlawon, Hulyo 18, naugkat nga patay gikan sa nitabon nga yuta nga gibana-bana sa rescuers nga mga pito ka metros na ang gilawmon.
Ang mga biktima giila nga sila si Phil Bryt Giangan, 22, ug Kent Daniel Casas Maglinte, 13, mga lumolupyo ra usab sa dapit.
Matod ni Police Corporal Mark Anthony Manulat, desk officer sa Danao City Police Station, nga nagkawot og yuta ang duha sa sapa nga wala nay tubig.
Apan pag-abot sa pito ka metros ang gilawmon, ningbangag na usab sila sa laing direksyon nga susama nag tunnel.
Sa ilang pagbangag, nahugnog kalit ang ibabaw sa yuta nga maoy mitabon kanila.
Adunay nakamatikod nga mga residente ug gidali pa unta sila sa pagtabang, apan naglisud pagkawot tungod sa giladmon.
Nanawag sila sa barangay nga mao na usab ang nitaho sa Danao City Police Station pipila ka oras ang milabay.
Dali usab nga niresponde ang rescue team sa Siyudad dala na ang backhoe.
Apan naglisud usab ang team tungod sa kadaghan nang bangag sa yuta nga gikawot sa mga tawo aron ibaligya ang yuta.
Ang yuta adunay sagol nga graba tungod kay kanhi sapa ang lugar.
Matubigan lang kini kon kusog ang bunok sa uwan sa bukid.
Gihulagway sa kapulisan ang pangubkob nga mao nay panginabuhian sa mga tawo.
Pasabot ni Manulat nga makadaghan nang higayon nga gireklamo ang lugar tungod sa illegal nga pagkawot sa yuta.
Hinungdan nga matag gabii na sila mohimo sa pagkubkob aron di mahibaw-an sa mga silingan.
“Usually, ang ilang binuhatan ana gabii, run and gun na sila kay kami sige man mig roving dihang dapita. Mabuntag kay daghang complain lagi anang kinabkaban unya kami ra pud ang bantayan kay naa pud lagi magbantay namo. Mao nang mi shift silag gabii na,” matod ni Manulat.
Dugang ni Manulat nga nagpadayon pa sila sa ilang imbestigasyon kon kinsa ang manubag sa kamatayon sa duha ka mga biktima ilabi na nga usa niini menor de edad pa.
Sa inisyal nila nga pakighinabi sa ginikanan sa 13 anyos, wa kini sugoa, apan sigun ni Manulat nga mopalawom pa sila sa imbestigasyon tungod kay nganong wa nila proteksyoni ang bata sa iyang pangidaron. (AYB)