NAGSUGOD na og dagan niadtong Sabado, Hulyo 18, ang 10 ka bus nga gitugotan sa Land Transportation Franchising and Regulatory Board (LTFRB) 7 nga modagan sa kadalanan sa dakbayan sa Sugbo karon nga gipaubos kini sa Modified Enhanced Community Quarantine (MECQ).
Matod ni LTFRB 7 Regional Director Col. Eduardo Montealto Jr., nga abli kini sa tanan apan prayoridad gihapon kadtong mga healthcare workers.
"Regular public transportation kay nag-open man ang mga malls and other essentials per EO (executive order) 84 of the Mayor (Edgardo Labella). Nag-request pud ang Mayor sa LTFRB 7 to compliment with PUB (public utility bus)," si Montealto sa Superbalita Cebu.
Base sa EO 84 ni Labella, temporaryo nga suspendido ang pampubliko nga sakyanan gawas lang niadtong gitugotan sa gobyerno o kadtong giisyuhan sa LTFRB 7 og special permits.
"EO 84 - Section G. All forms of public transportation shall be temporarily suspended except for commissioned shuttle service for employees of permitted offices or establishments, as well as point-to-point transport services provided by the government, giving priority to healthcare workers."
Ang maong mga bus airconditioned kini og aduna'y pletehan nga P13 sa unang lima ka kilometro ug P2.20 alang sa mosunod nga kilometro,
Aduna'y duha ka rota nga gihan-ay ang LTFRB 7 gikan Pardo hangtod SM City Cebu ug Pardo hangtod Talamban.
Alang sa Pardo - SM City nga rota ug pabalik moagi kini sa N.Bacalso/Emall; Osmeña Blvd; Fuente Circle/Robinsons Fuente; Mango Square/General Maxilom; DOLE 7; Robinsons Galleria ug SM City.
Pabalik gikan sa APM Mall ug moagi kini sa F. Cabahug; M. J. Cuenco; Landers; Ayala Center; Escario/Capitol; Fuente Osmeña Circle; Abellana Sports Complex; Emall; South Bus Terminal; Super Metro ug Citi Hardware.
Samtang sa Pardo - Talamban route ug pabalik moagi kini sa Shopwise; V. Rama; B. Rodriguez; Fuente Osmeña Circle; Robinsons Fuente; Capitol; Escario; UP Lahug; JY SQUARE; I.T. Park; Country Mall; Banilad Town Center; UC Banilad; ug USC Talamban.
Pabalik gikan sa USC Talamban; UC Banilad; I. T PARK; JY Square; UP Lahug; DOLE 7; Mango Square; Robinsons Fuente; Abellana Sports Complex; SSS; Gaisano Metro Colon; Gaisano Capital; Gaisano Jai-Alai; Supermetro Mambaling; ug Citi Hardware.
Matod ni Montealto nga mao usab kini ang hunonganan sa maong mga bus, "bus stops pud na pero naapa gyud kadtong usual nga bus stops. Dili pwede mohunong bisan asa."(HBL)