KON duna may maayong itupad ning mga panahona kana mao si Loren Legarda ug Inday Neri Soon-Ruiz: hulagway sa estilo sa pulitika nga hingpit nga misalikway bisan
sa kinabatakan nga prinsipyo.
Political prostitute ang haom nga panan-aw ni Jamby Madrigal kang Loren. Tungod kay human nihilak atol sa impeachment ni Erap siya nidagan isip bise presidente ni FPJ. Human niya kaligoa sa pagsaway ang iyang nahimong presidente, nakig-uban uban siya niini karon nga daw way nahitabo. Andam niyang lamyon ang tanan niyang gisuka sa tumong nga makapabor.
Adunay termino niini ang mga Tagalog: garapalan. Kaway-uwaw o sobra ra sab, kon sa atong inistoryahan. Ang matag tawo nasayod nga bisan ang pagkapraktikal dunay kinutuban. Ug nakita nato ang sangputanan kay si Loren gipildi ni Noli de Castro. Ang mga survey nagpakita nga kung ang eleksyon ipahigayon ning adlawa ilubong siya ni Mar Roxas kutob sa alimpo. Alang sa uban mao nay gitawag nga mirisi.
Unsa may katuohan nga rason nganong nikalit man og balitok si Inday Neri?
Kon working relationship o kasuod ang hisgutan, dili ba gud diay sila suod ni Gibo Teodoro nga ‘kaberks’ man sila pagpirma aron ma-impeach si kanhi Chief Justice Hilario Davide, Jr? Ug kay suod man kaha sila ni Manny Villar, daghan ang nahibong nganong kinahanglan pa man niya nga sikwation ang Lakas-Kampi nga karon nagkabuang kon kinsay mosagop nila hilabi na nga si Mayor Jonas Cortes naa na karon ubos sa landong sa Partido Liberal.
Dili ordinaryo nga miyembro si Inday Neri sa partido sa administrasyon. Tungod sa iyang kagamhanan, siya ang gipadagan pagkamayor. Si Cortes nga maoy incumbent nawani. Nabaliwa ang equity of the incumbent rule.
Dili ba nga usa man si Inday Neri sa unang nipadayag ug suporta kang Gibo? Kon atong largahan nga ang iyang desisyon pag-ambak ngadto sa pikas barko resulta sa iyang pagkonsulta sa iyang mga lider, morag nauwahi ang maong konsultasyon. Afterthought (ulahing hunahuna), your honor! Lugak, lapsaw, di katuohan.
Karon igo na lang si Gibo motuaw ug moingon, “Inday Neri, nganong gibiyaan mo ako.” Ug si Neri motubag, “Gibo, ayaw kabalaka, ang green ug ang orange usa ra. Nalimot ka?”
Gawas lang kpn mohatag siya ug ‘kombinsing’ nga rason sa iyang paglayat, di kalikayan nga magduda ang iyang mga kritiko nga sya miyembro sa ‘I-love-you-how-much Club’.
Tingali sunod adlaw sa atong pagmata, ang Lakas way nay lakas (kusog), ug ang Kampi wa nay kakampi. Ug ang One Cebu mahimong One Sibog o One Gwen o Lonely Gwen? (birada_ruphil@yahoo.com)