NANGHINAOT ang Chooks-to-Go Pilipinas 3x3 League nga tugotan sila sa Inter-Agency Task Force on Emerging Infectious Disease (IATF-EID) nga sugdan ang ilang season karong Septiyembre.
Kung tugotan sa IATF-EID, pasugdan dayon sa liga ang individual practices sa ilang mga miyembro nga teams.
Ang Chooks-to-Go Pilipinas 3x3 League nagplano usab nga ibutang ang mga duwa sa “bubble” sa Inspire Sports Academy sa Calamba, Laguna.
Ang “bubble” mao pud ang gibuhat sa National Basketball Association (NBA) diin ang players gi-isolate sa playing venue ug walay fans nga pwede makatan-aw sa mga duwa.
Una nang giaprubahan sa IATF nga makabalik sa ilang training ug conditioning ang Philippine Basketball Association (PBA), Philippine Football League, national 3x3 team ug professional boxing sa mga lugar nga ubos sa General Community Quarantine (GCQ).
Ang Sugbo adunay espisyal nga koneksyon sa Chooks-to-Go Pilipinas kay dinhi nahitabo ang makasaysayong Chooks-to-Go SBP 3x3 Basketball Tournament for Under-18 players niadtong 2019 sa Sisters of Mary School- (SMS-Boystown) sa Minglanilla.
Ang torneyo mikulit og rekord sa pinakadaghang players nga nagduwa og dungan.
Nitali kini og 3,000 ka mga magduduwa ug mibuak sa kanhi Fiba 3x3 record nga 1,898 ka mga partisipante.
Ang SMS-Boystown mo-host pa unta og laing torneyo niadtong summer apan na-kanselar kini tungod sa pandemya.
“Sa among part as fan sa 3x3 basketball and organizer sab, maayo kini nga balita alang sa mga player nga gusto nang makaduwa. Ang ilang plano ibutang kini sa “bubble” kay para sa safety pud sa mga player,” matod ni Van Halen Parmis, usa sa organizer sa Chooks-to-Go SPB Under-18.
Si Parmis , kinsa mao na karon ang gadala sa sports program sa Municipality of Tagoloan sa Misamis Oriental, miingon nga daghan ang players karon ang nagmagul-anon tungod kay walay duwa.
“Nindot ni makabalik kay at least mohatag ni og hope and maka-lift sa spirt sa mga player, especially katong wala sa pro league and naa nagduwa sa 3x3,” dugang ni Parmis.
“Ang 3x3 man gud kay lahi pud siya sa atong naandan nga 5-on-5.”
Dili lang ang pagbalik sa liga ang tumong ni league owner Ronald Mascariñas sa Bounty Agro Ventures, Inc. niining ilang lakang.
Nanghinaot usab siya nga gamiton ang bag-ong season alang sa pagpangandam sa national 3x3 team sa Olympic Qualifying Tournament sa sunod tuig.
Ang 3x3 Chook-to-Go pool team members kay mao sila Joshua Munzon, Alvin Pasaol ug PBA players CJ Perez ug Moala Tautuaa.