MINGBAHAG ang ikog kay nanalaw sa lantugi. Sila unta mga kandidato pagka Pamuno sa nasod sa umaabot nga eleksiyon sa Mayo 10. Nasagmuyo ang mga tawo sa gibuhat nila ni Manny Villar, Erap Estrada ug Gibo Teodoro pagbalibad sa lantugi.
Andam unta sila si Noynoy Aquino ug Mar Roxas sa Liberal Party sa pagpakiglantugi, apan mingkakak ang ilang kaaway. Busa gihunong ang “ Harapan” sa ABS-CBN nga mao untay modala sa debate.
Diha man unta sila si Dick Gordon ug Eddie Villanueva nga wa moatras, apan wa lagi idayon sa ABS-CBN kay gibang na ang maong programa. Nagpanglingo ang katawhan sa katalawan sa ubang mga Presidential candidates.
Dakong sayop ang ilang pagbalibad kay gipakyas nila ang katawhan nga igo lang unta mokilatis o mosuhid sa ilang katakos pinaagi sa pagpamati kanila sa ilang buot himuon kon mapili.
Matan-aw sad unta ang kahagkot sa ilang pangisip isip lider nga naglantaw sa umaabot. Ang kalig-on sa ilang baruganan masukod diha sa ilang mga pinulongan ug katarungan.
Ang gilawmon sa ilang tubag sa mga pangutana sa ilang kaatbang dayag nga maaninaw pod. Ingon man ang katin-aw sa ilang mga hunahuna nga maoy gikinahanglan diha sa usa ka lider labi na sa Pamuno sa nasod.
Nahibung kining lindog nganong si Gibo nitalaw. Sa tanan unta siya ang nagpakita sa kamasilakon sa iyang pangisip. Sa daklit lang gani, na-idolo siya sa mga tinun-an tungod kay maayo, takdo ug tin-aw siyang mamulong.
Namulso ang uban nga si Gibo nahawngan kuno ni Noynoy nga iyang ig-agaw. Labi na nga kini nahibawo sa iyang pagkatawo ingon man sa iyang mga sekreto. Mahadlok siya nga mabulgar kini atubangan sa katawhan panahon sa lantugi.
Sa laing bahin si Manny Villar labaw pang nahadlok tungod sa mga kontrobersiya niya diha sa senado. Ang double insertion niya sa budget ug ang pagtukod sa dalan duol sa iyang subdivision segurong mabuksan sa lantugi. Kurog siya niini.
Si Erap nga nakombikto sa pahimus-pangawat (plunder) sa bahandi sa nasod labaw pang gikuyawan. Nakaminos pag-ayo sa iyang pagkatawo mao ang habulan niyang pangisip.
Kon wa sila makauyon sa estilo sa “Harapan” nga way pugong-pugong ang mga sinultihan sama sa debate sa mga vice presidential candidates, mosugyot silag luho nga sistema. Di kay sila mobalibad dayon nga masabot hinuon nga naningkaag ang ilang balhibo sa katalawan.
Sayri Kini. Hataas kaayo ang kutay sa caravan ni Bise Mayor Abe Canoy sa San Fernando niadtong miaging Dominggo. Morag di mapupos. Kamatuoran kini sa kadaghan kaayo sa iyang mga lumalaban Naa niya god ang 15 ka mga barangay kapitan ug 6 ra kang Mayor Reluya. Apan layo pa ang eleksiyon, matira ang matibay matod pa.
(gapasan.erns@yahoo.com)