DAGHAN ang mga reaksyon sa usa ka pakigpulong nga giluwatan sa atong pangulong Rodrigo Duterte didto sa Jolo Sulu atubangan sa mga sundalo aron pagpabugnaw sa ilang mga ulo nga dili manimalos sa han-ay sa kapolisan nga mipatay sa mga army nga sakop sa Intelligence.
Ambot kung kinsay nag-edit sa diskurso nga giluwatan sa presidente sa dihang nagbuhi siya’g mga pulong nga nagkanayon “without declaring Martial law nabungkag nako ang mga oligarch sa sa atong nasud.
Adlaw’ng Lunes, petsa 13 ning bulan sa Hulyo, ug pagka-ugma Hulyo 14, sa gabii atol sa balita sa 24-Oras sa GMA, ug sa TV Patrol sa YouTube nga gi-aired nila ang pakigpulong sa atong presidente.
Tungod niini, gibarugan gyud ni spokesman Harry Roque nga wala daw nag-mention ang atong presidente nga si Eugenio Gabby Lopez sa ABS-CBN nga natak-opan ang ilang pagsibya, ug wala ma-renew ang prangkisa niini.
Apan, sa dihang gibalita sa duha ka network naklaro gyud nga gi-edit ang maong diskurso sa atong presidente, kay gilitok man gyud niya ang ABS-CBN nga iyang napasira tungod sa daghang mga kalapasan, sumala sa pagtuki sa Legislative Franchises Committee ug sa Good Government and Public Accountability.
Ang gikatingad-an sa tanan, nganong itago paman ang kamatuoran nga tinuod manggyud nga napasirad-an ang ABS-CBN kay iya naman kining gihulga sa iyang mga engagement niadto pan’g tuig 2017.
Dili sad katuohan ang gipakatag ni Roque nga way labot ang atong presidente kay neutral daw sa pagpasira sa maong network? Luyo sa kamatuoran nga daghan nang higayon nga gihulga kini sa atong pangulo ug majority sa mga kongresista nga PDP-Laban, diin iya kini.
Wala gani mahatagi og dakong pagtagad sa paglitok sa atong presidente ang Ayala Group of Company, MVP Manuel V. Pangilinan, kay matud pa, nangayo na kinig pasaylo, ug dako kaayo og natabang sa pandemic Covid-19, diin P9.5 bilyon sa Ayala, ug P5 bilyon kang MVP.
Kung successful ang atong presidente sa paggukod niining mga tikasan sa atong gobyerno, nganong ato pamang ilimod o itago nga dayag man kaayo ang kamatuoran? Dili man sad ta mutuo nga atong presidente ang nagbuot nga putol-putolon ang unod sa iyang diskurso aron dili mugawas nga siya gyud adunay pakana, sa pagpasira sa giant network?
Tama ang gihimo sa presidente nga gukdon ang mga oligarch nga maoy hinungdan sa kalisod sa mga kabus nga Pilipino, buot busalan ang ilong sa atong gobyerno ug magsunod-sunod sa ila, apan, wala ba usab han-ay sa mga Oligarch ang anaa sa administrasyon karon sa atong Presidente?
Aduna, aron dili kita mahimong bias, kinahanglan makita sab nato nga aduna sa’y mga Oligarch sa iyang palibot, pero wa kita’y nakita kon duna ba’y gihimo nga katiwali-an. Dili sad nato mabasol ang atong pangulo tungod kay mao man kini’y dunot nga sistima sa atong kasamtangang balaod.
Iya-iya og mga oligarch di ba? Pero kini na unta ang tukmang panahon nga bungkagon sa atong presidente kining maong dunot nga sistima, kanang wala na’y gahum ang mga oligarch nga mag-apil apil o manghilabot sa politika, tungod kay mosugot kita’g sa dili mas hawod pa sila kay sa presidente kung mudaug ang ilang gisuportahan.
Dili makapalag ang presidente, kay sila ma’y nakapadaug gusto nato nga wanay molabaw pa sa presidente, pero karon hawod ang mga oligarch. Pangit no?