DAVAO DE ORO -- Imbis nga kuwarta ang ibayad, bala na hinuon gipalubong sa lawas sa negusyante sa wala pa mailhing lalaki kinsa mipalit og sigarilyo didto sa Purok 3, Barangay Poblacion, Compostela alas 7:00 sa gabii sa Sabado, Hulyo 18, 2020.
Biktima giila nga si Rodette Villar, 41, molupyo sa Purok 3, Barangay Poblacion, Compostela.
Sa report nga nakuha gikan sa Compostela Municipal Police Station, nasayran gikan sa pamahayag sa merchandiser sa tindahan sa biktima nga si Jay Perocho, 25, nga niadtong higayona padung na silang manira sa tindahan dihang usa ka wala mailhing lalaki ang miduol ug mihangyo nga mopalit og sigarilyo.
Matud pa nga ang biktima mikuha og sigarilyo ug iyang gitunol sa lalaki.
Apan sa dihang ang biktima nangayo na sa bayad sa sigarilyo, ang wa mailhing suspek mihulbot sa wa matinong kalibre sa armas gikan sa sulod sa iyang sling bag, dayong gipusil ang biktima sa makadaghang higayon tumong sa nagkadaiyang parte sa lawas.
Gidali ang biktima og hatud sa iyang mga trabahante sa pinakaduol nga balay tambalan apan wa madugay gibalhin pagdala ngadto sa Davao De Oro Provincial Hospital sa lungsod sa Montevista.
Ang suspek, dali sab dayong mipadulong sa direksiyon sa Barangay Poblacion ug wala na masubay.
Narekober gikan sa crime scene ang upat ka basiyo ug tulo ka balines sa bala sa kalibre .45 nga pistola.
Motibo sa krimen, lakip na ang matuod nga bansagon sa suspek padayon pa karong gisusi sa kapulisan sanglit padayon pa ang ilang imbestigasyon.