USA ka idlas nga tigpayuhot og gidiling drugas ang nadakpan sa buy-bust sa Barangay Calongcalong, dakbayan sa Toledo niadtong Biyernes, Hulyo 17, sa alas 5:20 sa hapon, ug nasakmit ang shabu nga mobalor og P172,040 subay sa Dangerous Drugs Board (DDB) value.
Samtang, inahan ug anak nakuhaan og binultong drugas atol sa operasyon sa Sitio Ilaya, Barangay Cotcot, lungsod sa Liloan sa samang adlaw sa alas 3:35 sa kaadlawon. Nasakmit gikan sa duha ang P68 mil ng kantidad sa shabu.
TOLEDO
Ang dinakpan nga bigtime pusher mao si Colonel De Dios, 36, ulitawo ug nagpuyo sa nahisgutang lugar nga giisip sa kapulisan nga high value individual (HVI).
Si Police Staff Sgt. Jonathan Cuizon sa Toledo Police Station nga nahinabi sa Superbalita Cebu, nagkanayon nga si Colonel, ilang nadakpan human sa pipila ka semanang monitoring gumikan sa ka idlas ug daghan siyag mata sa nahisgutang dapit.
Naabtan kini sa dimalas naka-timing ang ilang tropa dihang gipalitag usa ka pakite nga shabu mobalor sa P300 ug ilang napusasan.
Nakuhaan pa siyag laing tulo ka dagkong bulto nga putos, siyam ka gagmayng putos, drug paraphernalia, P670 pesos nga halin.
Ang drugas motimbang kini sa 25.30 gramos og mobalor sa P172,040 mil ang DDB value.
Matod ni Police Staff Sgt. Cuizon, nga gisubay na sa ilang mga intelligence officer ang mga kontak sa dinakpan gikan sa silingang dakbayan ug lungsod.
LILOAN
Inahan ug anak nga bigtime pusher nakuhaag binultong drugas mao si Chona Wagas Tundag, 46, minyo, ug alyas Chon gipusasan uban sa iyang anak nga si Calvin Glien Wagas, 20, ulitawo.
Ang inahag anak nasikop sa joint buy-bust operation sa Provincial Intelligence Branch (PIB) ug Provincial Drug Enforcement Unit (PDEU) sa Cebu Police Provincial Office (CPPO) ug Liloan Police Station.
Si Major Danilo Colipano, hepe sa Liloan Police Station nga nahinabi sa Superbalita Cebu, nagkanayon nga si Chona, maoy ilang target sa operasyon.
Si Chona, nalakip sa ilang listahan nga High Value Target diin daghang impormasyon ang ilang nakuha gikan mismo sa mga residente sa dapit kabahin sa illegal nga kalihukan niini.
Sumala pa niya nga atol sa transaction, nakuhaan nila ang mga suspetsado og duha ka medium, apil na niini ang usa ka medium nga sabject sa buy-bust nga P500 nga gipaibabaw sa 24 ka P500 nga boodle money. Ang drugas nitimbang sa 10 gramos nga mobalor sa P68 mil DDB-value.
Gibutyag ni Colipano, alibi lang sa mga dinakpan nga planted ug gi-torture sila aron madaot ang pulis.
Gipasabot niini nga atol sa buy-bust operastion, ang anak nagbabag sa mga operatiba, nagsinggitsinggit, gisirhan ang purtahan.
“Madahan ngano gud intawon nga amo silang plantiran unya i-tortured nagsinggi-singgit na si Calvin aron ipagawas nga gidapatan,” dugang ni Colipano.
Gipadayag niini nga mismo ang mga silingan nahibalo sa ilang illegal nga kalihukan.
Sa nakuhang impormasyon sa kapulisan magpa-lending, ingon man may P.O. nga negosyo si Chona, ingon man mga apartment apan nilutaw nga drugas ang hapin niini.
Sumala ni Colipano, nga naanad na sila niining mga pasangil sa ilang mga dinakpan sa drugas nga mohimog estorya batok sa kapulisan. (GPL)