ANG kinatibuk-ang coronavirus infections sa nasod niambak ngadto sa kapin sa 67,000 sa Dominggo, Hulyo 19, 2020, human ang Department of Health (DOH) nitala og kapin sa 2,000 ka mga kaso sud lang sa usa ka adlaw.
Sa alas 4 sa hapon sa Dominggo, ang DOH nitala og kinatibuk-ang 67,456 ka mga kaso, lakip sa bag-ong kompirmadong mga kaso base sa mga taho sa 74 ka testing laboratories.
Ang DOH nipahibawo usab sa 58 nga dugang nangamatay, sagad gikan sa Central Visayas, nga nidala sa kinatibuk-ang patay sa coronavirus disease (Covid-19) ngadto sa 1,831.
Sa 58 nga nangamatay, 25 nahitabo sa Hulyo samtang 33 sa Hunyo.
Ang 54 kun 93 porsyento, gikan sa Central Visayas, 33 nahitabo sa Hunyo ug 21 sa Hulyo.
Ang Central Visayas naglakip sa Cebu City, nga giilang laing epicenter sa epidemya sa Covid-19 sa Pilipinas.
Dugang 389 ka mga pasyente ang naulian, nga nipasaka sa kinatibuk-ang recoveries ngadto sa 22,465.
Sa kinatibuk-ang mga kaso, 43,160 niini ang aktibo pa sa Dominggo. Ang DOH nitangtang sa 89 nga nagdoble gikan sa gidaghanon sa mga kaso.
Sa 2,241 ka bag-ong mga kaso sa Dominggo, ang kinabag-an nga 1,625 nagagikan sa National Capital Region kun Metro Manila, 115 gikan sa Laguna, 76 gikan sa Cavite, 75 sa Rizal ug 55 gikan sa Cebu.
Siyam sa 10, kun 90.1 porsyento sa mga kaso mild, samtang upat sa matag 1,000 grabe ug laing upat sa 1,000 kritikal ang kondisyon. Ang nahabilin kun 9.1 porsyento, way simtomas kun asymptomatic.
Ang DOH uban sa pag-abag sa ubang ahensiya sa kagamhanan nagpadayon sa ilang hugot nga kampanya sa paningkamot nga makonrolar na ang pagkatap sa virus sa labing daling panahon. (MVI, Sunstar Philippines)