PAGKATAG og malisyuso nga mga balita sama sa fake news mahitungod sa coronavirus disease 2019 (Covid-19) sa Dakbayan sa Mandaue pamultahon og P5,000 kon ipahamtang na.
Kini human nga gipalabang sa konseho sa Mandaue City ang gisugyot nga ordinansahon sa ikaduhang pagbasa, nga gisulat ni Mandaue City Councilor Carmelino del Mar, atol sa 53rd regular session.
Matod sa ordinansahon, walay tawo nga mopahayag, mosulti, magpakaylap pinaagi sa pulong sa baba o sinulatan, gipatik o gi-video pinaagi sa bisan unsang porma sa komunikasyon lakip na og dili limitado sa telepono, cellphone, fax sa pinaagi nga digital sama sa tawag sa cellphone, email, text message, chat, sa bisan unsang platform lakip na ang social media, ug mga kasayuran sa impeksyon sa Covid-19 sa usa ka tawo, klase, o grupo.
Gipasabot nga ang nakalapas sa maong ordinansahon adunay intensyon nga makahatag og paglibog ug pagkalisang sa komunidad kabahin sa Covid-19.
Ang ordinansahon magamit batok ni bisan kinsa, natural man nga tawo o juridical.
Ang bisan kinsa nga tawo nga molapas sa ordinansahon pamultahon sa kantidad nga P5,000 o maghatag sa 72-oras nga serbisyo sa komunidad sama sa pag-repack sa relief goods sa relief operations center ug ang moapud-apod sa relief goods sa lainlaing mga barangay o bisan unsang porma sa serbisyo sa komunidad, depende sa desisyon sa korte.
Giingon nga kon ang nakasala usa ka korporasyon, kooperatiba o asosasyon, ang silot ipahamtang sa opisyal nga responsable sa sala.
Sa kaso sa usa ka proprietorship, ang tag-iya ug manager, ang mga kasosyo manubag sa bisan unsang mga paglapas sa ordinansa nga wala’y pagpihig sa mga multa.
Ang business permit sab sa nakasala mamahimong ikansela o i-revoke ug mamahimo sab nga ipasira ang maong negosyo.
Sa kaso nga ang nakasala usa ka menor de edad, ang mga probisyon sa Republic Act 9344 o ang Juvenile Justice and Welfare Act ang gamiton.
Giingon ni Del Mar nga ang ordinansahon natuman tungod sa mga taho nga iyang nadawat bahin sa bakak nga pagkaylap nga ang usa ka tawo usa ka positibo sa Covid-19.
Dugang pa niya nga ang pagkatap sa maong “fake news” dili lamang ang makadaot sa mga biktima apan kini usab ang maghimo og usa ka kahadlok sa kasilinganan sa biktima.
Ang gitanyag nga ordinansahon kinahanglan pa nga aprubahan sa katapusan nga pagbasa sa sunod nga sesyon sa Hulyo 20, 2020.
Kon maaprobahan na ang ordinansahon, sa dili pa madugay mamahimo na kining ipatuman. (KFD)