HUMAN sa duha ka buwan, posible nga buksan na pagbalik ngadto sa publiko ang Basilica Minore del Santo Niño karong Agusto.
Kini kon mapaubos na pagbalik ang dakbayan sa Sugbo sa general community quarantine (GCQ).
Gisirhan ang Basilica human aduna’y personnel sulod sa simbahan ang nagpositibo sa Covid-19 niadtong Mayo 30.
Subay niini, gipahibawo na usab sa kadagkuan sa simbahan nga naka-recover na kadtong unom ka personnel sa maong simbahan nga nagpositibo sa Covid-19.
Matod ni Rev. Fr. Aladdin Luzon, OSA, nga maablihan ra nila sa publiko ang simbahan kon GCQ na ang dakbayan.
Dugang niini nga sundon sa Basilica ang guidelines nga giisyu sa Catholic Bishops Conference of the Philippines subay sa rekomendasyon sa Inter-Agency Task Force for the Management of Emerging Infectious Disease (IATF-MEID) 7 kabahin sa mass gatherings.
Dili gihapon makasulod sa simbahan kadtong 21-anyos paubos ug ang mga senior nga nagpangedaron og 60-anyos pataas.
Usa ra ang entrance ug exit nga ipatuman niini diin atubangan sa Magellan’s Cross mao ang entrance.
Susama sa mga gihimo na karon sa mga establisemento, himuon ang temperature check sa matag mosulod sa simbahan, ingon man sprayhan og alchohol ang kamot.
Anaa lang sa 300 ka tawo ang mamahimo makasulod sa Basilica o 10% kini sa kapasidad sa maong simbahan, “Once magsugod na ang misa, nagkasinabot mi mga pari nga i-discourage pud ang pagpasulod sa mga tawo kay ma-sacrifice man ang atong policy nga 10 percent,” si Luzon dihang gikuhaan kinig habig sa SunStar Cebu. (HBL)