SECTIONS
Superbalita Davao
Saturday, September 25, 2021
SUPERBALITA DAVAO

Roldan: Asa na si Fr. Rudy Romano?

Nota Bene

ANG mga millennials wala na nakahibalo kung kinsa kini si Fr. Rosaleo “Rudy” Romano CSsR, usa ka aktibistang pari nga Redemptorista nga kalit lang nahanaw mga 35 ka tuig na nga nilabay didto sa Cebu City.

Subay sa iyang gipanumpaang misyon, nidapig si Fr. Rudy sa mga kabus ug timawa nga gipanglutos sa diktaduryang rehimen ni Presidente Ferdinand Marcos aron makab-ot ang hustisya ug kaangayan sa ilang kahimtang.

Ug wala kini makalimti sa mga Sugbuanon busa niduyog usab sila sa ika-35 nga kasumaran sa iyang pagkawala niadtong Hulyo 11, 1985 pinaagi sa paghalad og espesyal nga Santos nga Misa bisan kung adunay “Covid-19 pandamay” ug ginagmay nga tapuk-tapok.

Naghimo sab og pamahayag ang Movement Against Tyranny (MAT) nga gilangkuban sa mga grupong relihiyuso, lideres sa pulitika, human rights organizations, mga aktibista, taga-academe, mga abogado ug uban pang sektor sa katilingban nga buot magkahiusa ang katawhang Pilipino aron pakgangon ang pagpanghasi og kabangis ug sundon ang ehimplo ni Fr. Rudy nga nitindog batuk ni Marcos.

Una siya nawala, nahimong lider si Fr. Rudy sa anti-Marcos movement sa Cebu diin nahimo siyang bise president sa Visayas sa Bagong Alyansang Makabayan (Bayan) ug nahimong popyular nga nagprotekta sa katungod sa kabus ug nag-una sa mga protesta sa pagpang-abuso sa tawhanong katungod.

Gidagit siya sa mga wa mailhi nga armadong tawo sa Barangay Tisa, Cebu City ug karon wa pa mahikaplagi kung asa siya o asa ang iyang lawas kung gipatay man siya.

Matud pa sa MAT nga giila nila ang kaisog ni Fr. Rudy nga nahimong giya nga iwag sa pagpadayon sa pagpanglupig ug abuso sa kasamtangang administrasyon ni Presidente Rudy.

Dugang pa nila nga ang kagamhanan nga gihimong armas ang iyang balaod aron sa pagpanglupig sa katungod sa katawhan nagpadaghan lamang sa mga Fr. Rudy sa katilingban.

Hinunua, nagmugna hinuon kini ug mga propeta ug manggugubat nga mobuntog sa pagpanglupig ug kabangis. Si Fr. Rudy kay nitibo sa Samar apan ang Cebu Provincial Government sa niaging mga katuigan nakapasar ug resolusyon nga gidawat si Fr. Rudy nga anak sa probinsya sa Cebu tungod sa iyang pagpanalipod sa tawhanong katungod ug paghatag ug serbisyong sosyal sa mga Sugbuanon.

Usa ka bato nga “marker” ang gimontar sa Barangay Tisa kung asa nawala o gidakop si Fr. Rudy. Nindot ang gibuhat sa mga Sugbuanon sa pag-ila ug paghinumdom sa pagkawala ni Fr. Rudy ug sa pag-ila sa lokal nga kagamhanan sa Cebu sa iyang nahimo sa panahon sa rehimen ni Marcos.

Sa pagkatinuod, daghan pang mga tawo nga nangamatay ug nangawala og nahanaw na lang sa panumduman sa katawhan nga biktima sa martial law ni Pres. Marcos.

Bisan tuod kung nahatagan na ang pipila sa “human rights compensation” nga gikan sa tinaguang bahandi sa mga Marcos, ang kasakit sa namatyan o nabiktima sa turtyor ug pagkawala dili mabayran og sapi.

May daghan pa gani kanila nga hangtod karon wa pa mahatagi sa danyos nga ilang nahiaguman kaniadto. Busa mangutana sa sab ko, asa na si Fr. Rudy?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph