MITAN-AW kog dugay kang Abner. Very serious ang iyang nawong.
“Lisora sabton anang imong giingon, uy, Abner.”
Hilom kong gibati ang kaluoy ngadto kang Abner. Nahimo siyang lawom nga manulti tungod tingali kay kanunay siyang nag-inusara.
“You know, Amel, pagkalisod gyud pangitaon sa usa ka pagbati nga naa na sa kasingkasing.”
Gusto kong hatagan og dalan si Abner nga makapadayag sa iyang feeling nako.
“Di man na lisod, Abne, kay kon tinuod nga naa na kana sa kasingkasing, aw, ipagawas gud. Di man na angay ikahadlok. Just stand kon unsa ang gibati.”
Nakapangawot si Abner sa iyang ulo. Sa akong paniid niya, di gyud siya makasulti nako sa iyang gibati.
Mitindog nuon si Abner. Iyang gikuptan ang akong kamot ug iya kong gipatindog. Na, nabatyagan gyud nako ang kainit sa iyang palad.
Didto sa unahan, nagpadulong si Reine sa among nahimutangan ni Abner. Gikamay ko siya. Nagkuyog ming tulo sa pagbiya sa baybayon. Gihatod ko nila ni Reine ug Abner sa akong gipuy-an. Unya namauli na sab sila sa tagsa-tagsa nila ka balay.
Samtang naghigda ko anang gabhiona sa akong kuwarto, morag gibati ko pa ang kainit sa palad ni Abner nga mikupot sa akong kamot. Unsay buot niya ipasabot sa iyang pagkupot sa akong kamot? Timailhan na ba kini sa iyang pagpadayag nako nga love ko niya?
Maoy gusto ni Abner nga magkarelasyon mi nga wa siya mangulitawo nako?
No! I don”t like this kind of relationship. M.U? My God!
Nakatulog ko nga morag kadlawon na. Si Abner ra ang nasulod sa akong hunahuna. Sa akong pagmata anang pagka buntag,siya sab ang unang nasulod sa akong hunahuna. Mipakibo na lang ko sa akong mga abaga. To be honest, di ko kalimbongan ang akong kasingkasing. Dugay na sab kong dunay hilom nga pagbati ngadto kang Abner.
Gusto ko unta nga isulti kini kang Reine aron iyang sultihan si Abner. Ug sa ingon makapadayag na si Abner sa iyang paghigugma nako.
(Sumpayan)