Martin: Tubig Queen 'nagamit' ni VP?

MAPASIGARBUHONG gipaambit ni Dodoy Teberio alyas “Tubig Queen” ang iyang pag-volunteer isip bus facilitator sa Bayanihan Sugboanon Free Shuttle Service.

Mao ni ang libreng sakay isip tabang ni VP Leni Robredo sa mga medical frontliner sa Sugbo aron dili na sila magproblema pa sa ilang pagpauli labi na sa disoras sa gabii.

Gi-share sad ni Dodoy nako ang video dihang nag-estorya sila ni VP Leni sa usa ka online show sa radyo. Maorag nahimo nilang “poster boy” si Dodoy sa Cebu.

Nasayud ta nga kusog sa masa ang Tubig Queen mao nga di kalikayan nga maduhigan ni og pulitika. Apan giklaro ni Dodoy nga wa siyay nadawat bisag usa ka dako ug iya ra gyud ning kaugalingong kabubut-on nga mag-volunteer aron makatabang sa panahon sa pandemya.

Masipang pakpak sa imong dalaygong buhat Dodoy. Salamat usab ni VP Leni nga padayon ang serbisyo bisan sa iyang sitwasyon karon.

Star Cinema

Kini diay pagkakanselar sa prangkisa sa ABS-CBN walay labot niini ang ilang mga film outfit nga Star Cinema ug Black Sheep.

Sa ato pa mahimo ra gihapong maka-produce og mga pelikula ang ABS-CBN. Mao ni ang gibutyag ni Star Cinema Regional Specialist Josie Pereyra nako.

Ang ilang upcoming movies naglakip sa “Love After Forever” starring Kathryn Bernardo ug Daniel Padilla ug ang “Praybeyt Benjamin 3” nilang Vice Ganda ug Ivana Alawi nga maoy official entry sa Star Cinema sa Metro Manila Film Festival karong December 25.

Sarah G

Ambot tinuod ba to akong nabasahan nga nitingog na kuno si Sarah Geronimo sa pagkasira sa ABS-CBN. Ah, karon na lang siya nitingog? Dugaya gud!

Dapat lang siyang motingog bisan respeto na lang sa estasyon nga maoy nakapahimo niya kon unsa siya karon. Kon di pa sa ABS-CBN maingon ana kaha siya kaharuhay? Mag-ila kaha sila ni Matteo?

Wa gani ko kakita nga dunay litrato si Sarah nga nagkupot siya sa iyang dughan isip timaan sa iyang suporta sa mga Kapamilya.

Sa una hadlok siya sa iyang mama. Ayaw kog ingna hadlok sad siya karong Matteo?

Karong Huwebes diay mga sikat nga bokalista sa banda ang akong mga bisita sa Ssssuper Ka! sama sa Cueshe, Stagecrew, Zee Band ug Missing Filemon. Kumusta na kaha sila? Rock `n roll kaha gihapon!? Abangan!