CROSS. Homan gikuniskunis ni Party List-Sagip Rep. Rodante D. Marcoleta ang ABS-CBN atol sa ilang aplikasyon sa pag-renew sa ilang franchise, iyang gisunod og hisgot ang iyang pending bill nga magdili sa mga nagdumala sa hospital nga magbutang og cross sa mga kwarto.
Nahimong kontrobersiya tungod kay daghan ang mirebenta, labina na ang simbahan Katoliko, sa paghisgot ni Marcoleta sa bill nga iyang gipasaka sa Kongreso niadtong Sept. 17, 2019 nga karon pending sa Committee on Justice. Ang punto ni Marcoleta nga dili mahiluna ang pasyente nga dili Kristiyano o Katoliko nga magtan-aw sa cross.
Ang cross maoy usa sa mga timailhan sa mga Kristiyano, nga nagtuo ni Hesu Kristo nga maoy gisunod sa mga Katoliko ug uban tinuohan nga nagtuo ni Hesu Kristo. Ang akong nahibaw-an nga si Marcoleta Iglesia ni Kristo mao nga naglibog ko nganong iyang gikontrahan ang krus nga nagtuo man siya ni Hesu Kristo. Gani, ang iyang simbahan nagdala sa ngalan ni Kristo.
Ako lang ni ipangutana kon anti-Kristo ba ni si Marcoleta. Kay sa iyang punto mora og adto padung sa direksyon nga makontrahan unya ang mga nagtuo o motuo sa mga pagtulon-an ni Hesu Kristo.
Ang lain punto nganong manghilabot man si Marcoleta sa tinuhoan sa uban tawo ingon man sa pagpadagan sa mga hospital, nga kadaghanan sa mga pribado nga hospital gidumala sa mga madre, nga nakahibawo ta nga Katoliko. Kon ang usa ka pasyente anti-Christ o di motuo ni Hesu Kristo adto siya magpatambal sa hospital nga ang nagdumala dili Katoliko.
Unya, dunay probisyon ang atong Batakang Balaod (Article II, Section 6) nga nagdili sa atong kagamhanan sa pagpanghilabot sa kalihokan sa mga tinuhoan o relihiyon ug nagdili usab sa libre nga pagsubay sa usa ka tawo o pundok sa ilang tinuhoan. Basin og nahikalimot si Marcoleta sa ani nga probisyon sa atong Batakang Balaod.
Daghan ang mikomentaryo sa social media nga basin nagtuo si Marcoleta nga sikat na siya human sa hearing sa komitiba sa Kongreso sa renewal sa franchise sa ABS-CBN diin iyang gipangunayan og laba ang management sa tanan isyu lakip na ang personal nga butang nga nga iyang gihisgutan.
Kita nga mga nagtuo ni Hesu Kristo, nga atong Diyos ug manunubos, labina sa mga Katoliko, atong barugan ug babagan ning lakang ni Marcoleta nga magdili og butang og cross sulod sa hospital kay og mopasar ni basin ang iyang sunod nga buhaton nga did-an usab ang mga hotel, pribado o publiko nga eskuylahan ug tanan establisemento sa pagbutang og cross ni Hesu Kristo.
Unya, atong ipanghinaut nga ibasura sa Kongreso kining bill ni Marcoleta, nga sa akong panan-aw kalihokan sa usa ka anti-Kristo.