LAING sakop sa Bureau of Jail Management and Penology (BJMP) 7 ang namatay niadtong Hulyo 19, 2020 sa gabii sulod sa usa ka tambalanan.
Kini ang gikompirmar ni Dr.Jay Ylanan, chief health services sa BJMP 7 nga nahinabi sa Superbalita Cebu pinaagi sa telepono.
Matud ni Ylanan, usa ka jail inspector ang namatay nga anaa sa 50 ang panuigon.
Katapusang nadistino sa Covid-19 facility sa BJMP sa dakbayan sa Mandaue.
Dugang ni Ylanan nga ang namatyan sa 50 anyos nga opisyal mao ang respiratory failure nga gisigundahan sa severe high risk pneumonia subay sa findings sa doktor ug ang resulta sa iyang death certificate gikan sa balay tambalanan kon asa kini namatay.
Ang maong opisyal sa wala pa kini makabsan sa iyang kinabuhi niadtong Biyernes, Hulyo 17, gidala sa usa ka pampubliko nga tambalanan, apan pagka Sabado, Hulyo 18, gibalhin sa usa ka pribado nga ospital tungod kay kinahanglan nga tauran og tubo.
“He needs further interventions man gud kay ubos ang iyang oxygen mao to nga gi- transfer siya og lain nga ospital,” matud ni Ylanan.
Gitin-aw ni Ylanan nga wala namatay ang maong opisyal tungod sa Covid-19 apan napaubos na kini og swab test apan wala pay resulta sa test gikan sa Department of Health (DOH).
Mao na kini ang ikaduha nga sakop sa BJMP 7 nga namatay sa nagpadayon nga pandemiya sa Covid-19.
Samtang, ang BJMP-7 nagbutang na og survivor officer ngadto na sa nahabilin nga pamilya sa namatay nga maoy moasikaso sa mga benepisyo ug pagpahiluna usab sa namatay nga opisyal sa iyang katapusang pahulayan.
Ang paryente sa namatay nga opisyal gisuwayan ug hangyo sa Superbalita Cebu nga makuhaan og habig ang pamilya apan mipahibawo kini nga dili lang sila magpa-interview ug gusto nga magpabiling pribado ang ilang pakig-uban sa mitaliwan nila nga minahal sa kinabuhi. (BBT)