Ferro: Mga libakera mahimong gamiton sa barangay contact tracing

CEBU. Brigadier General Albert Ignatius Ferro. (File photo)
CEBU. Brigadier General Albert Ignatius Ferro. (File photo)

KON ang mga libakera ug libakero kontrabida sa komunidad kay maoy sagad makagubag relasyon tungod sa ilang pagkatabian, karon nga panahon sa coronavirus disease (Covid-19) pandemic, hayan magamit ang ilang abilidad.

Unsaon man? Kana kon himuon silang contract tracers sa ilang tagsa ka komunidad.

Mao kini ang nahuna-hunaan ni Police Regional Office (PRO) 7 chief Brigadier General Albert Ignatius Ferro, kinsa sakop usab sa Regional Inter-Agency Task Force.

Matod ni Ferro nga mahimong magamit ang tsismosa brigade kay daghan kini og nahibaw-an sa komunidad tungod sa pagkausesera ug usesero, labina niadtong nangasakit og Covid.

Sa Lunes sa gabii, matod ni Ferro, iyang nadunggan nga mao kini ang nahuna-hunaan sa mga opisyal sa Bulacan aron paspas nga makakuhag mga impormasyon.

“I heard last night what you call this mga tsismosa brigade. Mga at least mga tsismosa brigade they could be a good source of ano daw sabi pa ni asa to nga lugar murag sa Bulacan. Sabi nila na mga tsismosa we ask you to help us sa contact tracing. So ana, baka kasi tong naay dili lang paglibak naa silay maayong matabang,” pagpasabot ni Ferro.

Ang contact tracing mao karon ang usa sa labing maayong hinagiban sa pagsanta sa local transmission sa Sars-CoV-2, kagaw nga nagdala sa Covid-19.

Ang Siyudad sa Sugbo duna nay labing minos 134 ka contact tracing teams nga gilangkuban og medical personnel, pulis ug bombero.

Ang mga barangay sa Siyudad sa Sugbo nagpadala usab og mga personnel aron bansayon isip contact tracers sa tagsa ka komunidad. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph