GIMANDO sa lungsod ang hinanali nga pagpasira sa Badian Highlands sa Hulyo 21, 2020 human sa pagdasok sa labing minos 300 ka mga rider sa dapit nga buot molantaw sa maanindot nga talan-awon sa viewing deck nga nag-umbaw sa bukiran sa lungsod.
Nasuta nga ang mga rider wa magmintinar sa health protocol bisan kon ang Lalawigan sa Sugbo ubos sa modified general community quarantine (MGCQ), sama sa social distancing ug kanunay nga pagsul-ob og face mask.
Gibutyag ni Donald Villarin, tourism officer sa lungsod sa Badian, nga ilang nasuta nga nagdasok ang mga rider sa lugar sa Dominggo, Hulyo 19, 2020.
Tungod niini, si Mayor Carmencita Lumain niluwat sa Executive Order 22, Series of 2020 alang sa temporaryong pagpasira gilayon sa Badian Highlands nga nag-umbaw sa pangpang nga dunay maanindot nga talan-awon kay makita ang Tañon Straight ug kabukiran.
"Nag-decide na gyud si mayor nga we will just temporarily close the Highlands kay delikado gyud siya. Dili gyud siya normal ang gidaghanon sa tawo," matod ni Villarin.
Matod ni Villarin nga atol sa pagsusi, nanagsul-ob og face mask ang mga rider, apan pag abot na sa lugar, gipanangtang na niini ang maskara.
"Nag mask man hinuon sila pero pag-abot sa taas na gyud, gitangtang na man ang face mask. Ila pud ingon kay ganahan sila mohanggap sa fresh air kay wala kuno na sa ilang lugar," matod ni Villarin.
Sa pakisusi, sagad sa mga riders wala moagi sa national highway, apan miagi kini sa diversion road sa Lungsod sa Dalaguete.
"Wala man ni siyay formal gyud nga agianan kay naa pa man ni siyay gi construct nga three-kilometer nga gi-construct pero ang kaning sa Highlands, human na ni siya, ang mga tawo nga moadto pwede ra mo standby didto," matod ni Villarin.
Wala pa'y petsa kon kanus-a buksan pag usab ang lugar.
Sa pagkakaron, gipakatap ang kapulisan sa lugar nga maoy mosusi kon may mopugos pag-agi.
Gilaraw usab sa lungsod ang pag limit sa mga turista nga buot mobisita sa lugar ug pagpatuman og standard speed limit.
Sa niining paagi, mahimong luwas ug makapahigayon og social distancing ang mga rider.
Ang lungsod sa Badian inila nga suroyanan sa mga turista ug mga Sugboanon tungod sa maanindot nga talan-awon sama sa Kawasan Falls, Kadungaw Peak, Osmeña Peak ug Lambug Beach.
Ang Badian Highlands maoy bag-ong tourist attraction sa lungsod nga nahimutang mga 1,640 ka tiil ibabaw sa sea level.
Niadtong Marso 13, gipahunong sa lungsod ang tanan nga tourism activities ubos sa mga lakang pagpugong sa pagkatap sa coronavirus disease.
"You are always welcome anytime after the temporary closure. Wala mi gipili. We are happy to see you there and to look sa beauty sa nature," tataw ni Villarin. (ANV)