MIRESULTA sa duguon nga hitabo, human duha ang napatay atol sa pagsilbi sa warrant of arrest aron unta arestuhon ang lider sa Kapa Community Ministry International nga si Pastor Joel Apolinario.
Sa report, nahitabo ang pinusilay tali sakop ni Apolinario, 46, ug mga awtoridad didto sa hilit nga bahin sa Sitio Dahican, Barangay Handamayan, Lingig, Surigao del Sur, Hulyo 21, alas 7:30 sa buntag.
Suma pa, miadto ang hiniusang puwersa sa kapulisan, lakip na Philippine Coast Guard aron isilbi ang warrant kang Apolinario nga gipangita sa balaod tungod sa kasong syndicated estafa nga way piyansa.
Ang warrant giisyu ni Judge Gil G. Bollozos sa 10th Judicial Region, Regional Trial Court, Branch 21, Cagayan de Oro.
Apan inay nga motuman nga malinawon sa warrant nga gipresenta, mibawos na hinuon sa pagpaulan og bala ang sakop ni Apolinario nga miresulta sa kamatayon sa duha niya ka sakop nga padayon pang giila sa awtoridad samtang gisuwat kining balita.
Usa sab ka Melecio Siano nga giingong sakop sa pastor ang gidala sa Bislig City District Hospital human maigo og bala sa wala niyang paa.
Narekober sa mga awtoridad ang nagkadaiyang klase sa armas, 30 units sa M16 rifle, 2 units M4 rifle, Garand rifle, 3 units sa M60 machine gun, 50 caliber sniper rifle, 3 units caliber 22 rifle, carbine, shotgun, rocket propelled grenade, 5 units caliber 45 pistol ug nagkadaiyang matang sa bala.
Giingong miresunder sab si Apolinario sa awtoridad human sa makalisang nga hitabo nga mitugaw sa malinawong dapit sa Sitio Dahican, Barangay Handamayan.