KONGRESISTA Nerissa Soon Ruiz gi-junk na sa One Cebu Party kagahapon sa hapon.

Kini bisan kon nipahibawo si Ruiz nga bisan kon wa na siya magsuporta kang Lakas-Kampi-CMD standard bearer Gilberto Teodoro ug mo-resign sila sa One Cebu party, si Garcia gihapon ang iyang suportahang kandidato pagka gobernador.

Click here for Election 2010 updates

“Thanks.. But no thanks”, matod ni Garcia sa pamahayag ni Soon Ruiz nga adto gihapon siya mopaluyo sa gobernador ug kang Glen Soco sa Probinsya sa Sugbo bisan toa na siya magpaluyo kang Nacionalista Party presidential candidate Manny Villar.

Tungod niini nga kalambuan, ang One Cebu Party abli sa posibilidad nga mopaluyo og laing mga kandidato o partido nga modagan sa siyudad sa Mandaue.

Si manlalaban Rory Jon Sepulveda, sakop sa executive committee ug tigpamaba sa One Cebu Party, niingon nga wa nila kinahanglana pa ang pasalig ni Ruiz.

“We don’t expect nga mo-support pa siya namo. All I can say, ang One Cebu way kandidato sa Mandaue,” matod ni Sepulveda.

Sa pagka karon, ang One Cebu Party wa pay gipaluyohan nga kandidatong lokal sa Mandaue gikan sa mayor ngadto sa pagka konsehal.

Abli ang ilang pultahan kon si kinsa kadtong mga kandidato nga moduol kanila ug gustong mopasilong sa One Cebu aron suportahan.

Gitataw ni Sepulveda nga bugtong magpabilin sa One Cebu sa Mandaue mao sila si Bokal Weng Gakit ug kanhi mayor Thadeo Ouano nga modagan sa pagka board member sa 6th district.

Sila si Gakit ug Ouano wa mo-resign sa One Cebu Party, matod ni Sepulveda.

Tungod niining maong kalambuan, si Manlalaban Gonzalo Malig-on, tigpa-maba ni Ruiz, niingon nga nakurat sila sa desisyon ni Garcia.

Matod ni Malig-on sa interbyu sa Sun.Star Superbalita nga adunay tigom nga pagahimuon uban sa tanang sakop sa Nagkahiusang Mandauehanon aron tukion ang hukom sa gobernador.

Human sa ilang tigom, ni-text si Malig-on sa Sun.Star Superba-lita sa ilang opisyal nga pamahayag.

“We respect the decision of the governor. We hope we can leave this behind us as we look forward to a full blast campaign after Holy Week,” matod sa text message ni Malig-on.

Sa sayo pa, si Ruiz uban sa iyang mga kaalyado sa politika nga mga sakop sa Nagkahiusang Mandaue-hanon nipadalag suwat sa buhatan ni Garcia aron pag-resign gikan sa One Cebu Party.

Gipasalig ni Ruiz nga bisan pa man og mogawas na siya sa One Cebu Party, padayon nga iyang paluyohan si Garcia uban ni Soco.