Kabtangan sa scammer bawion sa PSC, OSG

NANGAYO og tabang ang Philippine Sports Commission (PSC) sa Office of the Solicitor General (OSG) aron pagbawi sa mga personal property sa ilang kanhi empleyado nga nalambigit sa payroll scam.

Sa iyang suwat sa OSG, gihangyo ni Ramirez nga pahugtan ang proceedings sa complain nga gi-file batok kang Paul Michael Ignacio, apil na ang pagkuha sa real o personal property ni Ignacio ug ibalik sa gobyerno.

Si Ignacio, kinsa usa ka contract of service employee sa PSC, nalambigit sa payroll scam nga mokabat sa P14 milyones sa sulod sa lima ka tuig.

Nasakpan lang ang iyang modus karong tuiga ug nasikop sa National Bureau of Investigation (NBI) niadtong miaging semana.

“We need all the help we can get to get to the bottom of this and make every effort that nothing of this sort ever happens again,” matod ni Ramirez, human nahibalik sa iyang leave of absence.

Mao kini ang usa sa unang gipangbuhat ni PSC Commissioner William “Butch” Ramirez sa iyang pagbalik niadtiong Lunes human natapos ang iyang usa ka buwan nga leave.

Si Ramirez ni-leave kay niatiman sa iyang asawa nga gikan sa bile duct operation.

Matod pa sa imbestigasyon, aduna nay mga napundar nga negosyo ug personal nga mga gamit si Ignacio.

Ang Sugbuanong si Commissioner Ramon Fernandez, kinsa maoy nahimong officer-in-charge sa dihang nag-leave si Ramirez, niingon nga angayan lamang na palapdan ang pag-imbestigar niini.

“The board is 100 percent with the Chairman on this,” matod ni Fernandez. Si Atty. Guillermo Iroy Jr., ang Deputy Executive Director for Support, mao ang mangulo sa legal team alang sa kaso ni Ignacio.

Ang pamaagi ni Ignacio mao ang pag-usab sa listing sa payroll, iyang gilakip sa lista ang mga national athletes ug coaches nga wala na sa national pool. Ang payroll niining iyang mga gipanglista mo-diretso sa iyang account. (RSC)