NAKURAT ko sa dihang akong nabasa ang siyam ka mga drug lord sa New Bilibid Prison (NBP) sa Muntinlupa ang namatay sa Covid-19.
Usa niini mao si Jaybe Sebastian, 40, convicted drug lord, ug kontrobersyal nga piniriso human nabutyag nga dunay VIP treatment sa bilanggoan sa milabayng mga tuig.
Laing walo nga namatay kasagaran mga foreigner nga nagpadagan sa shabu laboratory nga naronda sa kapulisan.
Sus! Sa kadaghan sa mga piniriso, nganong sila man gyud ang namatay nga nalambigit sa kalihukan sa drugas? Wa kaha kini gituyo aron hiloan ug gipagawas lang ang Covid-19 ang hinungdan?
P14B SA PHILHEALTH
Para nako, ang P14 bilyon maayong gamiton sa panginahanglan sa mga tawo nga gipanggutom. Di lang una ibayad isip refund sa mga pribadong ospital. Di man gud na sila mapurdoy ug di magutman ang mga tag-iyag ospital.
Sa pag-admit sa mga pasyente sa Covid-19, di ba mga ordinaryong tambal lang ang gidapat sa mga doktor, sama sa paracetamol, vitamins, pagkuha og temperatura ug blood pressure, sugar level ug pagbutang og oxygen kay wa may tambal ang Covid-19?
Human niining tanan, ang mabulahan ug mosamot kabilyonaryo ang mga adunahan na daang tag-iya og ospital.
GIPULITIKA NI TOMAS
Saba kaayo ang mga tawo ni kanhi Cebu City mayor Tomas Osmeña nga nagsaway ni Cebu City Mayor Edgar Labella sa pagdumala sa krisis sa Covid-19.
Para kaha ni Tomas, siya lang ang kamao sa pagdumala sa krisis nga sama niini? Maayo pa og mohatag og ayuda si Tomas sa katawhan.
Karon nagbutag og streamer ang kampo ni Tomas sa mga butang nga maayong buhathon aron malikay sa Covid-19.
Tataw nga usa ka matang sa pamulitika. Maayo pa nga sultian nila ang katawhan kon unsay nakatabang ni Tomas.
Bati kaayo. Nagsige sila og panaway. Wa gyud makatampo og kaayuhan sa katawhan sa dagkayan.
Stay safe. Stay at home. Kini mao ang labing luwas nga paagi batok sa Covid-19. (efrenlonzon71@gmail.com ug text sa 09235562777)