Si Presidente Rodrigo Duterte niuyon sa limitadong face-to-face basic education classes sugod sa Enero 2021, apan alang lang sa low-risk nga mga dapit nga ubos sa modified general community quarantine (MGCQ).
Apan ang pribadong mga tunghaan nga nagsugod na sa limitadong face-to-face nga mga klase sa Hunyo 2020, hinuon, tugtang makapadayon, matod ni Presidential Spokesperson Harry Roque sa iyang virtual press briefing sa Martes, Hulyo 21, 2020.
Bisan unsang pagtugot sa face-to-face nga mga klase sa nagkadaiyang mga dapit kinahanglang may pagtugot tali sa local government units (LGUs), Department of Education (DepEd) ug lokal nga mga awtoridad sa panglawas.
Si Roque niingon nga ang Presidente, kinsa nakigtagbo sa mga sakop sa Inter-Agency Task Force for the Management of Emerging Infectious Diseases (IATF) sa Lunes sa gabii, Hulyo 20, nitataw nga kinahanglan nga motuman gihapon sa estriktong health standards.
Ang pagpatuman sa gikinahanglang health standards sugdan ug susihon una sa National Task Force Against Covid-19.
Mao kini ang mosunod nga health standards:
Policy sa tunghaan nga ang way mask, di pasudlon;
Panghunaw sa mga kamot ug hygiene sa mga kamot;
Regular nga disinfection sa palibot sa tunghaan;
Pagsusi sa temperatura ug respiratory symptoms;
Kinahanglan nga motambong sa klase mga 15 ngadto sa 20 lang ug i-rearrange ang mga lingkuranan aron tumanon ang social distancing;
Ang panagsang pag-adto sa tunghaan ipahaum sa distance learning;
Kinahanglang kontrolahon ang pag-agi sa mga tinun-an ug personnel sa entrance ug exit.
Dunay makitang instructions, signages ug mga marka; ug
Pangandam ug kinahanglang dunay case management system ubos sa pakigtambayayong sa local government unit ug lokal nga mga awtoridad sa panglawas alang sa contact tracing, testing, isolation ug treatment.
Si Education Secretary Leonor Briones, kinsa nitambong sa press briefing, nitataw nga ang face-to-face nga mga klase limitado lang.
Itugot lang kini sa mga dapit nga way kaso sa coronavirues infections, mga isla ug layo nga mga barangay.
“Hindi lahat, hindi pinipilit lahat ng mga learners na dumaan sa prosesong ito (We are not forcing all learners to participate in this process),” matod ni Briones.
Siya niingon nga ang mga ginikanan nga di gustong motugot sa ilang mga anak sa pagtambong sa face-to-face nga mga klase mahimong modangop sa online learning. Kon dunay suliran sa pag-connect sa internet, ang DepEd nag-andam usab og mga klase nga ipaagi sa radyo, telebisyon o reading materials.
Si Briones niingon nga ang mga tunghaan kinahanglan dunay tubig ug tambal, ug kinahanglan nga kanunay duawon sa mga trabahante sa panglawas.
“Mahalaga ang suporta ng local government...kasing-halaga ng suporta at cooperation ng parents,” dugang ni Briones.
Ang tuig tigtungha sa 2020-2021 buksan sa Agusto 24, 2020. Sa Hulyo 15, dunay kapin sa 20 million ka mga tinun-an nga nang-enroll sa basic education tibuok nasod. (SunStar Philippines)