GITUGOTAN na sa Department of Interior and Local Government (DILG) ang Cebu City nga maka-angkas na sa motorsiklo ang mga minyo, live-in partner ug manag-uyab panahon sa modified enhanced community quarantine (MECQ), human mi-aprobar ang Inter Agency Task Force (IATF).
Si Atty. Ian Kenneth Lucero, pangulo sa DILG-Cebu City, nipadala na og suwat ngadto kang Cebu City Transportation Office (CCTO) chief Alma Barandog Casimero alang sa pormal nga pagpahibawo.
Apan ang pagtugot sa DILG adunay kondisyon sama sa pagbutang og barrier nga aprobado sa IATF, sul-ob og mask, gwantis ug crash helmet.
Kinahanglan usab nilang ipakita ang valid identification card aron maoy magpamatuod nga sila kasado or adunay relasyon sa usag usa sama sa kapuyo o manag-uyab.
Samtang sa dakbayan sa Talisay dili pa makapatuman sa mag-inangkasay sa motorsiklo sa kay nagpaabot pa sila sa Implementing Rules and Regulation (IRR) gikan sa Land Transportation Office (LTO)-7, pahibawo ni Jonathan Tumulak, city traffic head sa Talisay.
Dugang pa sa opisyal nga ila sab nga gipaabot ang “go signal” sa Department of Transportation (DOTr)-7 kalabot sa maong katuyoan.
Hangyo lang ni Tumulak sa mga Talisaynon og pagsabot ug tahuron ang mga lagda aron dili madakpan. (PAC, BBT)