KAPULISAN sa Central Visayas mopalapad sa ilang contact tracing ug nahukman nga makig-alayon sa komunidad ilabi na niadtong gihulagwayng mga tsismoso ug tsismosa sa pagsubay niadtong posibleng nakasinati og sintomas sa coronavirus disease (Covid-19) diha sa ilang dapit.
Ang dakbayan sa Mandaue nagkinahanglan og dul-an sa 400 ka contact tracers.
Si Police Brigadier General Albert Ignatius Ferro, hepe sa Police Regional Office (PRO) 7, nagkanayon nga kon giila ang mga libakera nga kontrabida sa ilang dapit gumikan sa pagpakatap og tabi, mao na kining higayon nga makatabang sila sa katilingban panahon niining pandemya.
Matod ni Ferro, pinaagi sa masagap nga kasayuran ngadto sa ilang mga silingan dali nalang ang paghimo og pakisusi niadtong indibiduwal nga posibleng carrier sa coronavirus.
Mipasabot si Ferro ang giatubang nga krisis dili lang responsibilidad sa kagamhanan, kapulisan, militar o mga health officials apan lakip na na ang kinabag-an.
Pinaagi sa pagtinabangay di layo ang kahigayonan nga makab-ot ang tinguha sa pagsanta sa pagkuyanap sa coronavirus.
Ilang gitinguha nga mapalapdan pa ang contact tracing nga nakitang epektibo nga paagi sa pagkunhod sa kaso sa mga nagpositibo susama sa gihimo didto sa Baguio City.
Kasamtangan, gibahin ngadto sa lima ka cluster ang contact tracers sa dakbayan sa Sugbo nga maoy gitahasan nga mosusi o moila sa mga barangay niadtong residente nga posibleng natamptan sa Covid-19.
Sa susamang kalambuan, ang Mandaue City mopalig-on sa ilang contact tracing pinaagi sa pagdugang og contact tracers.
Matod ni Atty. John Eddu Ibañez, executive secretary sa Mandaue City Mayor Jonas Cortes, adunay 200 ka contact tracers ang dakbayan.
Gipaninguha sa Dakbayan nga makabaton og 593 ka mga contact tracer aron makab-ot ang ratio nga sa matag contact tracer alang sa 2,000 ka tawo.
Kinahanglan pa ang Dakbayan sa Mandaue nga mokuha og 393 ka contact tracers.
Apan matod ni Ibañez nga ang ratio nga girekomendar sa Inter-Agency Task Force on emerging Infectious Diseases (IATF-EID) mao nga sa matag contact tracer alang sa 800 ka mga tawo.