Delos Reyes: Sayo nga prediksyon sa eleksyon

NAGSUGOD na ang kasikas sa mga politiko pagpangandam alang sa piniliay sa tuig 2022 diin mahuman na ang termino ni President Rodrigo Roa Duterte ug ang laing napulo'g duha ka mga senador.

Nagpadayag kini kon unsa kaaktibo ang mga politiko sa nasud diin pulos magpasiatab nga moserbisyo sa katawhan.

Dili ikalimod nga kusog pa ang administrasyon nga ginasuportahan sa mga miyembro sa mayoriya sa mga congressman ug mga senador, luyo sa mga delubyo nga mihapak sa panahon sa pamunoan ni President Digong, ug sa iyang mga gibuhat, ang paggun-ob sa oligarkiya nga mitay-og sa mga adunahan nga kanhi nagpahimulos sa ilang gahom tungod sa kwarta.

Ang kanhi mga kaalyado ni Digong sa iyang kandidatura pagka presidente sa milabay nga eleksiyon, ang mga sakop sa pundok nga walhon, karon mao gihapon ang pundok nga mibalik sa ilang naandan nga kalihukan sa pagsaway sa kagamhanan pinaagi sa mga rally ug mga lihok protesta, apan nagpabilin nga wa matarog ang baroganan sa presidente nga miputol na sa mga pag pakighinabing pangkalinaw ug mideklara kanila nga kaaway sa gobyerno.

Sa pag-angkon ni President Digong nga iya nang nabungkag ang oligarchy sa nasud, padulong gihapon kini sa pagtukod sa laing oligarchy matud ni Senador Franklin Drilon.

Kon matinud-anon si Digong sa pagbungkag sa oligarchy, iyang bungkagon ang political dynasty kay mao kini ang gamut sa oligarchy sa atong nasud matud ni Drilon.

Sa atong yano nga pagsabot, daw gibati nagkahadlok ang oposisyon kay dili layo sa kamatuoran ang posibilidad nga si presidential daughter, Davao City Mayor Sara Duterte-Carpio, ang mopuli sa lingkuranan ni Digong ug maoy mopalong sa ilang handum nga mobalik paghupot sa gahom diha sa Malakanyang.

Sa karon nga panahon, daw walay lig-on nga tawo ang himoong manok sa oposisyon nga iparang sa kandidato sa administrasyon nga kung ihatag ni Digong sa uban, mas ihatag niya kini kang Mayor Inday!

Nadungog na sab gikan sa baba ni President Digong ang iyang pagsugyot o pagsuna kang Mayor Inday nga modagan kung ugaling duna siya’y ikatampo alang sa nasud, apan ayaw nalang kung personal lang nga ambisyon.

Gipakita na baya ni Mayor Inday Sara nga duna siya’y liderato sa iyang pagpanguna pagkampanya ang mga kandidato pagka senador sa milabay nga mid-term elections diin walay usa sa kandidato sa Otso Diretso ang midaug sa piliay.

Sa nakalabay nga Kongreso, gipakita ni Mayor Inday duna siyay gahum ug mga suporter nga mipaluyo sa pagpalagpot kang Congresman Pantaleon Alvarez sa iyang pwesto pagka speaker sa House of the Representatives.

Bisan pa kuhaon ang suporta sa mga walhon nga grupo, duna pay igong numero nga masaligan nga solid gihapon nga makapadaug sa kandidto sa administrasyon sa umaabot nga eleksiyon.

Layo pa ang eleksiyon apan sa atong panglantaw, dili layo ang posibilidad nga ang bisan kinsa nga ituboy ni President Digong, kinsa man ang iyang pandungan sa iyang kamot, maoy mahimong sunod nga pangulo sa atong nasud, labi na kung si Mayor Inday ang iyang ituboy.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph